Pòtoprens 10 dawout 2005 [AlterPresse] --- Chèf civil Misyon Nasyonzini pou Estabilize Ayiti (MINISTA) Juan Gabriel Valdès di li konstate gen amelyorasyon nan zafè
sekirite nan peyi a epi li pwofite felisite fòs lòd yo pou bon travay li di yo founi nan kwape bandi nan kapital la dènye jou sa yo.
Nan yon konferans pou la près li bay 9 dawout la, anbasadè Valdès fè konnen « gen gwo amelyorasyon ki fèt nan kesyon sekirite an Ayiti ». Dapre anbasadè a, « sitiyasyon akalmi sa a se rezilta jefò misyon la pè k nan peyi a, la polis ak popilasyon ayisyen an ki bay bon jan kolaborasyon pou kwape bandi nan kapital la ».
Reprezantan sekretè jeneral nasyonzini an Ayiti pale tou sou bon jan koperasyon ant misyon la pè a ak gouvènman tranzisyon an.
Valdès fè konnen tou li satisfè nan fason l wè popilasyon ayisyen an al fè kat elektoral. Chilien an tou pwofite lanse yon pinga bay moun ki ta panse fè lòbèy pou anpeche dewoulman eleksyon yo nan finisman ane a. Li di MINISTA pap sitire bandi fè dezòd pou twouble eleksyon yo.
Nan menm dosye eleksyon an, anbasadè chilyen an di l ankouraje patisipasyon medam yo nan pwosesis la. « Nou pare pou n apiye medam yo kit se sa k pra l vote, kit se sa k kandida », dapre pwòp pawòl Valdès.
Sou kesyon kalandriye elektoral la, Valdes di kominote entènasyonal la pa gen pwoblèm si KEP a ta fè kèk chanjman nan kalandriye a. Dapre li, sa k pi enpòtan se wè yon lòt prezidan ki soti nan eleksyon chita sou fotèy boure a nan dat 7 fevrier 2006. [lf gp apr 10/08/05 10:00]
Consulter +
