Pòtoprens 10 dawout 05 [AlterPresse] --- Sekretè jeneral Konsèy Elektoral Pwovizwa (KEP) Rosemond Pradel deklare bay AlterPresse jounen 10 dawout la enstitisyon an poko bay dizon l sou posibilite pou ta fè kèk chanjman nan kalandriye elektoral la .
Pandan l t ap reyaji sou yon deklarasyon chef kabinè patikilye prezidan an, Michel Pierre
Brunache, bay ajans Associated Press sou chanjman ki ta fèt nan kalandriye a, Pradel fè konnen klèman « KEP a poko fè okenn chanjman nan dat ki te prevwa pou òganize eleksyon yo ».
Associated Press rapòte deklarasyon Brunache ki fè kwè KEP a deside chanje dat eleksyon lokal yo ki te gen pou fèt 9 octobre, pou mete yo an desanm yon fason pou
nasyon an kab prepare pi byen eleksyon pou senatè ak prezidan ki gen pou fèt nan dat 13
novanm.
« Si se gouvènman tranzisyon an k gen pou l òganize eleksyon yo, ke l pibliye kalandriye l » : se sa Pradel ki te montre l estomake fè AlterPresse konnen.
KEP a deja pouse dat pou fèmen enskripsyon elektè yo pou 15 septanm, nan lide pou pèmèt plis moun fè kat yo. Premye delè a te bout 9 dawout. [fl gp apr 10/08/2005 19:00]
Consulter +
