Español English French Kwéyol

Ayiti-Anviwónman : Yon ti gason 2 lane ak yon papa menm fanmi mouri ankò nan debouláy tè nan Pòdpè

Pòdpè, depatman Nòdwès Ayiti, 5 me 2024 [AlterPresse] --- Yon ti gason 2 lane ak yon papa menm fanmi pèdi lavi yo ankò, nan debouláy tè, samdi 4 me 2024 la, nan Site Limoza, katye Lakoup, vil Pòdpè, depatman Nòdwès, dapre temwayáy konfrè jounalis Jhonson Fenelus bay AlterPresse ak AlterRadio.

2 lòt moun, ki te nan kay kote debouláy tè a fèt la, blese anpil. Yo te kouri ak yo nan lopital leta Pòdpè a, pou yo resevwa laswenyáy nesesè yo.

Dimanch apremidi 28 avril 2024 la, 3 moun yon menm fanmi, Widaens Belfort, yon ti gason 4 lane, Yoldine Sila, yon fanm ansent 29 lane, ak Elda Belfort, 58 lane, mouri, lè yon mi tonbe sou kay kote yo te ye a.

Dram sa a rive nan ri lopital vil Pòdpè, depatman Nòdwès, kote lapli ap tonbe depi plizyè jou. Anpil anpil moun te kouri ale nan Lopital leta Pòdpè a, pou evite yo ta viktim nan gwo lapli sa yo.

Te gen plis pase 200 kay ki te anvayi ak dlo nan depatman Nòdwès la, nan lapli k ap tonbe depi vandredi 26 avril 2024 la, dapre yon ranmase pwoteksyon sivil.

Menm dimanch apremidi 28 avril 2024 la, dlo k ap desann ak anpil fòs yo te lakoz gwo domaj nan yon pon, ki separe komin Sen Lwi diNò ak Ansafolè a, depatman Nòdwès.

Nan gwo lapli k ap tonbe depi samdi 13 avril 2024 la toupatou sou teritwa Ayiti a, pwoteksyon sivil konte 13 moun ki pèdi lavi yo ak 3 lòt ki disparèt, nan deboulày tè, jedi 2 me 2024 la, nan zòn Baryè Boutèy, Okap, depatman Nò.

Gen 25 kay ki sibi domaj nan gwo lapli sa yo. Gen tou 2 mil 260 kay ki anvayi ak dlo, Okap, toujou dapre ranmase pwoteksyon sivil peyi d Ayiti a. [ppsf rc apr 05/05/2024 9:10]