Pòtoprens, premye me 2024 [AlterPresse] --- Sitiyasyon danje dlo, ki ka desann bridsoukou yo, ap pèsiste, nan finisman apremidi, nan aswè ak pandan lannuit lan, nan depatman Nòdès, Nò, Plato santral, Nòdwès, Sid, Grandans, Nip ak Lwès, kote nou jwenn zòn metwopoliten Pòtoprens lan.
Se avètisman sa a espesyalis ayisyen yo nan kondisyon tan an bay ankò, nan dènye bilten yo.
Dlo yo desann ak anpil fòs plizyè kote nan depatman peyi d Ayiti yo. Sa ki lakoz gwo difikilte pou machin ka rive pase sou plizyè wout ki anboulatya ak labou, dapre temwayáy ki vin jwenn AlterPresse ak AlterRadio.
Se pou sa, tout sila, ki rete nan zòn difisil yo, sitou bò rivyè, bò ravin, nan flan mòn, nan depatman sa yo, moun sa yo dwe veyatif ak suiv konsiy sekirite nesesè yo, nan moman gwo lapli k ap tonbe yo.
Koumansman mwa me 2024 la, vin gen plis imidite nan lè a sou yon gwo zile Karayib yo.
Se yon sitiyasyon k ap kontinye báy bon jan aktivite lapli, ki mache ak loráy, nan finisman apremidi, nan aswè ak pandan lannuit lan, jis rive finisman semenn nan, sou depatman Nòdès, Nò, Plato santral, Latibonit, Nòdwès, Sidès, Sid, Grandans, Nip ak Lwès.
Peyi d Ayiti sou twazyèm semenn, youn dèyè lòt, anba gwo aktivite lapli, ki mache ak loráy, toulèjou.
Gen nyáj sou depatman peyi d Ayiti yo, depi nan maten, pase nan apremidi pou rive nan aswè ak lannuit lan.
Nivo chalè a ap wo pandan jounen an.
Soti nan nivo 34 degre Sèlsiyis, tanperati a pral desann ant 20 pou al 16 degre Sèlsiyis, nan aswè.
Pinga antre nan fon lanmè a, ki move anpil
Detan yo va evite rantre nan fon lanmè a, k ap move anpil, kaptenn bato, chaloup, bwa fouye, pipirit yo, dwe toujou pran prekosyon nesesè yo bò tout kòt peyi d Ayiti yo.
Vag yo ap monte nan nivo 8 pye wotè bò kòt Nò yo ak 6 pye wotè bò kòt Sid peyi d Ayiti yo. [rc apr 01/05/2024 11:00]
Consulter +
