Pòdpè (Nòdwès Ayiti), 29avril 2024 [AlterPresse] --- 3 moun yon menm fanmi, pami yo yon ti gason 4 lane ak yon fanm ansent 29 lane, mouri nan apremidi dimanch 28 avril 2024 la, lè gwo lapli k ap tonbe yo lakoz debouláy tè, ki fè yon mi tonbe sou kay kote yo te ye yo. Se Widaens Belfort, yon ti gason 4 lane, Yoldine Sila, yon fanm ansent 29 lane, ak Elda Belfort, 58 lane, ki mouri, lè yon mi tonbe sou kay kote yo te ye a. Dram sa a rive nan ri lopital vil Pòdpè, depatman Nòdwès, dapre konfrè jounalis Jhonson Fenelus.
Akoz gwo lapli sa yo, anpil moun ki rete nan ri lopital te kouri al pran refij nan lopital leta Imakile Konsepsyon an, Pòdpè.
Plizyè katye, tankou Nan Demelis, Labèl Plas, Nan Dyerilinon, Lòt bò pon, anvayi tou ak dlo nan Pòdpè.
Gen plis pase 200 kay ki inonde nan gwo lapli sa yo nan depatman Nòdwès la, dapre pwoteksyon sivil’
Menm dimanch apremidi 28 avril 2024 la, dlo k ap desann ak anpil fòs yo andomaje yon pon sou wout komin Sen Lwi dinò ak Ansafolè a, depatman Nòdwès, kote gen gwo inondasyon, dapre temwayáy ki vin jwenn AlterPresse ak AlterRadio.
Nan dènye jou sa yo, gang ak zam yo atake fwaye Sen Vensan, kote ki te gen timoun ak andikap, nan ri antèman anba lavil Pòtoprens lan. Tout moun, timoun, fanm ak gason, ki te nan Fwaye Sen Vensan an, te sètoblije deplase kouri kite espas lan pou al chèche refij lòt kote. Biwo sekretè leta, ki anchaje moun ki gen andikap yo, leve lavwa kont zak laterè gang ak zam yo fè sou fwaye Sen Vensan an, k ap ride kominote Ayiti a depi lane 1945.
Atak gang ak zam yo vin lage nan plis madoulè timoun ak andikap, ki te nan Fwaye Sen Vensan an. Detan l swete solidarite tout moun, biwo sekretè leta ki anchaje moun ki gen andikap yo ekzije respè dwa moun ki gen andikap yo nan peyi d Ayiti.
Dimanch 28 avril 2024 la, 2 prizonye mouri, 9 lòt prizonye ak 3 polisye nasyonal blese, nan moman yon gwoup prizonye t ap eseye sove nan prizon vil Ench, depatman Plato santral. 2 prizonye yo mouri anba bal, lè yo t ap eseye pran zam polisye ki te sou plas yo, dapre enfòmasyon ki vin jwenn AlterPresse ak AlterRadio.
Nan zòn metwopoliten Pòtoprens lan ak anpil lòt vil nan pwovens yo, pri galon gazolin lan ap vann nan lari a mil 500 goud, alòske ponp gaz yo vann ni 570 goud, lè yo genyen. Ou bezwen mil goud pou w achte yon galon dyezèl nan lari a, alòske ponp yo konn vann galon diezèl la 620 goud. Gen anpil ponp ki fèmen, akoz difikilte pou kamyon al ranpli gaz nan tèminal Vare a, ki se gwo depo gaz nan Site Solèy lan, dapre enfòmasyon ki vin jwenn AlterPresse ak AlterRadio.
Se depi lendi 22 avril 2024 la anpil anpil ponp gaz pa louvri nan zòn metwopoliten Pòtoprens lan. Se depi dat sa a gang ak zam yo te rive ankò estannbáy plizyè gwo machin sou wout ki mennen nan tèminal Vare a, ki gen gwo depo gaz nan Site Solèy lan. Mannèv gang ak zam yo anpeche kamyon yo al pran diezèl, gazolin ak gaz blan nan tèminal Vare a, nan Site Solèy.
Anpil kote nan zòn metwopolitenn Pòtoprens lan ak nan lòt depatman peyi d Ayiti yo, se nan galon ak dwoum, gaz ap vann byen chè nan lari, san okenn dispozisyon sekirite konsekan, dapre temwayáy ki vin jwenn AlterPresse ak AlterRadio.
Se madi 30 avril 2024 la, anba je laprès ak delege 9 sektè yo, pral gen eleksyon pou chwazi youn pami 7 manm ki gen dwa vote andedan Konsèy prezidan pou tranzisyon an, ki pral jwe wòl kòdonatè aksyon Konsèy prezidan pou tranzisyon yo. Se sa k soti nan yon reyinyon, ki te fèt samdi 27 avril 2024 la.
Se nan finisman mwa me 2024 la premye gwoup, ki pral andedan fòs miltinasyonal pou kore sekirite a, ta sipoze koumanse vin deplòtonnen sou teritwa Ayiti a. Sa ta sipoze fèt apre vizit prezzidan Kenya a. William Ruto, nan Washington, kapital peyi Etazini, nan dat jedi 23 me 2024 la. Se sa jounalis ameriken Jake Johnston ekri sou kont X li. [ppsf emb rc apr 29/04/2024 14:19]
Consulter +
