Pòtoprens, 27 avril 2024 [AlterPresse] --- Jan sa ye depi plizyè jou, gen gwo danje dlo ki ka desann bridsoukou, nan finisman apremidi ak aswè, nan depatman Nò, Plato santral, Sid, Grandans ak Lwès, kote nou jwenn zòn metwopoliten Pòtoprens lan.
Se pou sa, tout sila, ki rete nan zòn difisil yo, sitou bò rivyè, bò ravin, nan flan mòn, nan depatman sa yo, moun sa yo dwe veyatif ak suiv konsiy sekirite nesesè yo, nan moman gwo lapli k ap tonbe yo.
Se avètisman sa a espesyalis ayisyen yo nan kondisyon tan an báy ankò, nan dènye bilten yo, AlterPresse ak AlterRadio li.
Toujou gen imidite nan lè a ak lòt kalte boulvès nan tan an sou gwo zile Karayib yo, jodi a.
Se yon sitiyasyon k ap kontinye báy bon jan aktivite lapli, ki mache ak loráy, nan finisman apremidi ak aswè, sou depatman Nòdès, Nò, Plato santral, Latibonit, Nòdwès, Sidès, Sid, Grandans, Nip ak Lwès.
Depi semenn pase, gen gwo aktivite lapli, ki mache ak loráy, toulèjou sou depatman peyi d Ayiti yo.
Gen nyáj divès kote, depi nan maten.
Tan an pral fèmen nan finisman apremidi ak aswè.
Nivo chalè a wo anpil ni lajounen, ni lannuit yo.
Soti nan nivo 36 degre Sèlsiyis, tanperati a pral desann ant 24 pou al 18 degre Sèlsiyis, nan aswè.
Ki jan lanmè a ye jodi a ?
Detan yo va evite rantre nan fon lanmè a, k ap move anpil, kaptenn bato, chaloup, bwa fouye, pipirit yo, dwe toujou pran prekosyon nesesè yo bò tout kòt peyi d Ayiti yo.
Vag yo ap monte nan nivo 7 pye wotè bò kòt Nò yo ak 5 pye wotè bò kòt Sid peyi d Ayiti yo. [rc apr 27/04/2024 12:00]
Consulter +
