Español English French Kwéyol

Ayiti-Konsèy Prezidansyèl tranzisyon : Òganizasyon Ayisyen nan Miyami, Nouyòk ak Kanada di pinga

Pozisyon Inisyativ Sitwayen nan Nouyòk pou soutni Akò Montana a, Komite Solidarite ak Rezistans Pèp Ayisyen an nan Miyami ak Kowalisyon Ayisyen nan Kanada kont diktati nan peyi d Ayiti

Dokiman sa a vin jwenn AlterPresse nan dat 25 avril 2024

“Veye yo , bare yo, gen lalwa pou sa”, se sa nou te konn di lò nou t ap batay kont diktati tout plimay.

Lè a vini jodi a, alòske yon Konsèy Prezidansyèl tranzisyon fèk monte sou pouvwa a, pou nou di ankò : Veye yo !

Pep Ayisyen an soufri twòp.

Nou p ap aksepte tonbe nan menm katchouboumbe, ki mennen nou nan sityasyon nou rive jounen jodi a.

Gang yo kontinye ap touye, maspinen, fòse moun kite lakay yo, kraze lopital, inivèsite ak pòs polis, bloke wout. Yo kidnape leta. Lamizè ak grangou ap vale teren. Se yon kapital k ap mouri. Se yon peyi k ap mouri.

Lò Dessalines te di « koupe tèt, boule kay « , se pat kay malere, ak malerèz k ap bat pou yo jwenn lavi.

Pandan preske twa lane, plizyè òganizasyon sivil, ki sòti nan fen fon peyi a te rasanble anba banyè gwoup Montana a. Yo pwopoze solisyon pou yon chanjman koupe fache ak rejim restavèk Pati ayisyen tèt kale a (Phtk), ki, depi lane 2010, ap mennen nou, ak tout vitès, nan yon ravin san fon, abò yon machin lanmò, k ap mache ak gaz koripsyon ak enpinite.

Plizyè nan pwopozisyon Montana yo, sou sekirite, jistis, patisipasyon, desantralizasyon, sèvi baz pou akò politik ki mennen nou rive, jodi a, nan enstalasyon yon Konsèy prezidansyél tranzisyon, k ap pèmèt rebat kat yo.

Se pa tou sa Montana te pwopoze ki nan akò sa a, men se YON KONPWOMI ki pou frennen machin lanmò a , pou gen de lòt règ nan jwèt politik la.

Se yon etap enpòtan. Epi nou salye jefò tout patisipan yo ak Caricom ki ede akò sa a fèt.

Men pèp ayisyen soufri twòp pou nou ta va aksepte chat nan makout. Epi nou pa ka mete chat sa a veye mantèg.

Gouvenman demisyonè Ariel Henry an, ki mennen nou kote nou rive jounen jodi a, pibliye yon dekrè sou fòmasyon Konsèy prezidansyèl tranzisyon an, ki chanje de bagay enpòtan nan akò tout patisipan yo te siyen ak Caricom, yon akò menm yo menm te siyen.

NOU VLE AKÒ SA A PIBLIYE san yo pa wete ni mete. Nou vle konnen ki dwa gouvènman nou voye jete a genyen, pou li chanje akò a.

Menm jan nou panse gouvènman de fakto a pa t gen okenn lejitimite pou l ap bay moun leson sou Konstitisyon, menm jan an tou nou panse moun ki kontribye nan mete peyi a lan eta li ye a pa kapab pretann pou se yo menm k ap kontrole Konsèy la.

VEYE YO ! BARE YO !

Pèp Ayisyen an soufri twòp pou nou aksepte nou tounen nan menm jwèt sal, kenbe pouvwa pou avantaj pèsonel, sèvi ak gang pou anpeche pèp la mande « ki kote lajan Petro Karibe a fè » .

Akò Montana a chita sou you seri valè etik ki pa negosyab. Yo prepare yon dokiman ki distribye ak resevwa ak respè nan nivo nasyonal ak entènasyonal.

Se valè sa yo ki dwe alabaz Konsey Transitwa a, nan respè lalwa ak Konstitisyon peyi nou.

Lè yo t ap eli kandida Montana a pou Konsèy Tranzitwa a, yo montre kòman eleksyon ka fèt nan transparans. Yo montre tou kòman Ayisyen, ki sòti nan diferan orizon, ka chita ansanm, diskite epi rive jwenn konsansis, paske yo mete enterè peyi a pi wo pase enterè pèsonèl pa yo. Sa a se koupe fache ak sistèm nou genyen jodi a.

Noumenm nan dyaspora a, k ap pote sipò bay Akò Montana a, n ap konbat tout politik bouyi vide, k ap dechèpiye enstitisyon peyi a depi katòz lane. N ap denonse tout mannèv dilatwa, ki toujou lakòz peyi a ap kontinye mache sou ranfò soulye l ak kwi nan men li.

Nou bouke ak politisyen ki vle kenbe menm sistèm devalize kès peyi a, akapare pouvwa a pou plen pòch yo, pandan y ap fèmen je yo sou vyolans ak grangou k ap fini ak peyi nou.

Epi nou gen dwa pou nou konnen sa k ap fèt, nan transparans.

Nou gen dwa patisipe nan sa k ap fèt nan non nou, pèp ayisyen.

Nou bezwen de moun responsab kom Kowòdonatè Konsèy prezidansyèl la ak kòm premye minis peyi a, pou tranzisyon an reyisi.

NOU BEZWEN PATRIYÒT ki kwè nan peyi nou, ki kalifye, ki onèt, pou ride nou soti nan kriz lanmò ak kraze brize n ap viv jounen jodi a.

Pep Ayisyen an soufri twòp

Gen yon lespwa pou chanjman. An n pa gaspiye li.

N AP VEYE !

Men moun ki siyen yo:

Inisyativ Sitwayen nan Nouyòk pou soutni Akò Montana a

Daniel Henrys

Daniel Huttinot

Julien Jumelle

Lionel Legros

Michèle Montas

Komite Solidarite ak Rezistans Pèp Ayisyen an nan Miyami

Hudes Desrameaux

Abel Simon Zéphir

Kowalisyon Ayisyen nan Kanada kont diktati nan peyi d Ayiti

Jean-Claude Icart

Chantal Ismé

Richard Mathelier

Dominique Mathon

Walner Osna

Alain Saint-Victor