Gotson Pierre
Pòtoprens, 13 avril 2024 [AlterPresse] --- Chak fwa Ayisyen ak Ayisyèn yo kwè kòd kriz la pral demare, li parèt sere pi di oubyen se yon ne ki ajoute anplis.
Se sa peyi a ap viv nan moman sa yo, plis pase yon mwa apre premye minis defakto Ariel Henry fin demisyone.
30 jou deja pase. Se tchouboum. Patikilyèman, fewosite gang yo ki t ap mande demisyon Aryel Henry pa febli.
Deja, se tèt 9 manm Konsèy prezidansyèl tranzisyon an y ap mande. Yon Konsèy ki rete kwoke pandan yon tan. San pèsonn pa kab di si l dekwoke ak dekrè gouvènman ki demisyone pibliye 12 avril la pou kreye ofisyèlman Konsèy la.
Dekrè gouvènman ki la a pibliye a pa kadre ak pwojè manm Konsèy la te prepare apre li fin fòme dapre antant pati ayisyen yo te jwenn ak medyasyon Kominote Karayib la (Karikòm).
Divès peyi ak enstitisyon entènasyonal bat bravo san yo pa parèt konnen si dekrè a gen pikan kwenna ladan l, piske li sanble mete anpil baryè pou rive nonmen ofisyèlman manm Konsèy prezidansyèl tranzisyon an.
Se semèn k ap antre la a, moun ap konnen kilè li fè nan mont peyi d Ayiti.
Kit Konsèy la nonmen ofisyèlman epi enstale finalman ou pa, kouman Ayiti kapab soti nan lojik kriz san fen, kriz san bout la? [gp apr 13/04/2024 20 :00]
Consulter +
