Español English French Kwéyol

Virewon aktyalite Ayiti : Gang ak zam yo kontinye simen laterè nan Ba latibonit lan

Pòtoprens, 9 avril 2024 [AlterPresse] --- Se toujou gwo kout rèl nan plizyè komin Ba Latibonit yo, kote gang ak zam kontinye ap simen laterè san gade dèyè. Vandredi 5 avril 2024 la, gang ak zam Gran Grif Savyen Ti Rivyè Latibonit yo te asasinen pou pi piti 9 moun, blese 8 lòt ak kidnape 10 moun nan lokalite Dwèt, sou wout ki mennen Lyankou a, depatman Latibonit. Yon lide sou sitiyasyon an nan Ba Latibonit avèk temwayáy yon abitan sou AlterPresse ak AlterRadio.

Gen anpil anpil timoun ki toujou sou gwo chòk ak kè sote, avèk vyolans ak laterè gang ak zam yo, ki asasinen yo, blese yo, fè kadejak sou yo. Gen yon gwo kantite timoun ki sètoblije deplase ak fanmi yo, k al chèche refij lòt kote. Pil ak pakèt timoun sa yo pa rive jwenn sèvis yo plis bezewn yo, tankou yo pa ka ale lekòl nan sitiyasyon latwoublày sa yo. Se kout rèl Fon Nasyon zini pou timoun (Unicef).

Nan atak yo fè lendi 8 avril 2024 la, gang ak zam yo fè anpil dega nan Kolèj Bird, nan ri antèman Pòtoprens. Lannuit dimanch 7 pou antre lendi 8 avril 2024 la, gang ak zam yo t al dechèpiye, nan ri Montalè, Pòtoprens, lekòl pwofesyonèl Jean-Baptiste Damier (J.B. Damier) ki ekziste depi lane 1926.

Plizyè konpayi deside pa al pran machandiz ak lòt pwodui sou waf Pòtoprens lan, toutotan poko gen bon jan kondisyon sekirite. Gang ak zam yo kontine ap atake bato, k ap fè ale vini sou lanmè a, bò kòt zòn metwopoliten Pòtoprens lan.

Lendi 8 avril 2024 la, te gen gwo kè kase nan plizyè katye zòn metwopoliten Pòtoprens lan, akoz menas gang ak zam yo ki te fè konnen y ap atake polisye nasyonal ak tout lòt moun ki ta soti nan lari. Kout bal t ap pete nan komin Taba, kafou wout Dèlma ak wout aryopò entènasyonal Pòtoprens lan, sou Chanmas la bò Palè nasyonal la ak lòt katye. Lapolis ak militè te fè fas kare ak gang ak zam yo, ki te kontinye ap fè mannèv pou ta eseye vin pran kontwòl Palè nasyonal la sou Chanmas, dapre temwayáy ki vin jwenn AlterPresse ak AlterRadio.

Depi jedi 29 fevriye 2024 la, gang ak zam yo asasinen anpil anpil moun, pami yo polisye nasyonal, nan laterè yo vin angrave pi rèd nan zòn metwopoliten Pòtoprens lan. Yo atake ak boule pòs polis, lekòl, inivésite, bibliyotèk, lopital, famasi, biwo leta, biwo eta sivil, depo manje, elatriye. Yo kontinye ap pete kout bal, lajounen kou lannuit, nan plizyè katye. Yon sitiyasyon, ki kontinye pouse anpil anpil moun vin sètoblije ap kouri kite lakay yo pou al chèche refij lòt kote.

Mèsi tout moun ki te leve vwa yo pou ekzije bandi ak zam yo lage m. Se èd nou tout, yon fason oubyen yon lòt, ki fè yo lage m jodi a. Se mesaj espesyalis nan kondisyon tan an, Rudy Victor, ekri sou kont X li, apre bandi ak zam ki te kidnape l, jedi 4 avril 2024 la ansanm ak madanm li, lage l lendi apremidi 8 avril 2024 la. Bandi ak zam yo te lage madanm ni menm jedi 4 avril 2024 la.

Polisye nasyonal yo pa dwe pran nan kaponnay gang ak zam yo, k ap fè pase menas sou rezo sosyal yo. Gen anpil nan gang ak zam ki tonbe nan boukantáy kout zam ak lapolis nasyonal la, nan dènye jou sa yo. Lapolis la pa dwe pran nan presyon, nan travay l ap fè yo. Malgre difikilte yo, popilasyon dwe toujou konte sou lapolis la ki la pou pwoteje ak sèvi l kòmsadwa. Se konsiderasyon sou AlterPresse ak AlterRadio Sendika nasyonal polisye ayisyen yo (Synapoha).

Lendi 8 avril 2024 la, otorite konsèy ekzekitif enterimè lakomin Taba a kraze plizyè kay, ki te toupre aryopò entènasyonal Pòtoprens lan, pou evite bandi ak zam yo ta vin fè atak sou aryopò entènasyonal Pòtoprens lan, dapre enfòmasyon ki vin jwenn AlterPresse ak AlterRadio.

Lè gang ak zam yo mande fanmi ki te kite lakay yo retounen, se yon mannèv pou mete fanmi yo douvan, pou gang ak zam yo pwoteje tèt yo lè lapolis nasyonal la va vin twoke kòn ak yo. Gang ak zam yo santi yo pral nan difikilte, apre yo fòse plis pase 400 mil moun fòse kite lakay yo depi lane 2023 a. Se avètisman pwofesè dwa entenasyonal James Boyard.

12. Depi finisman semenn pase a, gadkòt gwoup zile Bahamas yo arete sou lanmè plis pase 250 natif natal Ayiti, pami yo 11 timoun, 39 fanm, ki te pran kanntè pou al chèche lavi miyò nan peyi etranje. Otorite gwoup zile Bahamas yo ta dwe pimpe vini nan peyi d Ayiti migran sa yo, dapre enfòmasyon ki vin jwenn AlterPresse ak AlterRadio. [ppsf emb rc apr 09/04/2024 13:14]