Gotson Pierre
Pòtoprens, 7 avril 2024 [AlterPresse] --- Gang yo bat rekò nan touye moun an Ayiti pandan 30 dènye ane sa yo an Ayiti, dapre konsta ki fèt apati estatistik disponib AlterPresse konsilte.
Pandan 3 an koudeta militè beny san soti 1991 rive 1994 kont administrasyon Jean Bertrand Aristide ki te soti nan eleksyon 1990 yo, militè ak paramilitè touye 3000 moun atravè peyi a.
Men kantite moun ki mouri nan vyolans gang nan peyi a sèlman an 2023 prèske double. Estatistik Nasyonzini fè konnen se 5000 moun ki mouri anba vyolans gang an Ayiti pou ane 2023 a.
Dapre menm estatistik yo, pou 3 premye mwa ane 2024 la, se omwen 1500 moun ki mouri an Ayiti anba bal, nan laterè gang yo simaye.
Konparezon ant moun ki deplase pandan peryòd koudeta militè a nan tout peyi a ak kantite moun ki nan kouri nan moman vyolans gang yo montre yon sitiyasyon katastwòf.
Pandan 3 an koudeta a, yo te konte ant 200.00 a 300.000 moun ki deplase anndan peyi a.
Soti 2021 rive 2024, se anviwon 400.000 moun ki nan kouri anndan peyi a, yon bon pati na yo blije kite kapital la, Pòtoprens, pou chape anba mechanste gang yo.
Sitiyasyon kriminalite a angrave depi jedi 29 fevriye 2024 la. Gang ak zam yo asasinen anpil anpil moun, pami yo polisye nasyonal nan zòn metwopoliten Pòtoprens lan.
Yo atake ak boule pòs polis, lekòl, inivésite, bibliyotèk, lopital, famasi, biwo leta, biwo eta sivil, depo manje, elatriye.
Yo kontinye ap pete kout bal, lajounen kou lannuit, nan plizyè katye.
Pòtoprens ak zòn ki viwonnen l yo tounen yon kokennchenn prizon, kote se tout popilasyon an ki anba kontwòl gang ak zam yo. Douvan sitiyasyon sa a, dwe gen bon jan aksyon ki fèt san pèdi tan pou pote sekou bay popilasyon an, dapre espè endepandan Nasyon zini pou dwa moun nan peyi d Ayiti a, Ameriken William O’Neill.
Gen danje pou yon kokenchenn masak fèt sou popilasyon peyi d Ayiti a. Se avétisman reprezantan pèmanan peyi d Ayiti douvan Konsèy dwa moun Nasyon zini yo, Justin Viard. [gp apr 07/04/2024 19:30]
Imaj achiv
Consulter +
