Gotson Pierre
Pòtoprens, 6 avril 2024 [AlterPresse] --- Ou mete dife nan bibliyotèk la? Men se yon kokenn krim ou fè. Se pwòp ti limyè k ap klere nan nam ou an ou touye. Piske, premye sa moun bezwen genyen se konesans lasyans…Apre sa w ap jwenn libète… Konprann byen, tou sa se pou ou. E se oumenm ki touye l ankò.
Se gwo ekriven franse Victor Hugo ki ekri pawòl sa yo sou leve kanpe ki te genyen an 1872 nan Paris, kote yo t ap mete dife nan yon bann senbòl nasyonal, tankou gran bibliotèk…
Se yon tèks yon zanmi pataje nan moman kriz san parèy n ap viv la.
Moun ak tout byen prive ak sosyal anba gwo atak gang san rete nan Pòtoprens, pandan demach ap fèt pou antre nan yon tranzisyon, apre pouvwa ki te la a pase sou peyi a tankou yon siklòn.
Se depi jedi 29 fevriye 2024 la laterè gang ak zam yo ap angrave rèd mare. Gang ak zam yo asasinen anpil anpil moun, polisye nasyonal. Yo atake, boule, kraze pòs polis, lekòl, inivèsite, lopital, famasi, eksetera.
Mèkredi 3 avril 2024 la, nan yon atak yo fè sou Bibliyotèk nasyonal d Ayiti a, ki ekziste depi lane 1939, nan ridisant Pòtoprens, gang ak zam yo kraze dèlko bibliyotèk nasyonal la epi vòlò, bwote ale anpil mèb.
Pandanstan, nan nivo politik, tout sektè, ki voye delege andedan Konsèy prezidan pou tranzisyon an, ta deja antann yo sou yon akò politik pou yon tranzisyon nan lapè, k ap byen òganize sou teritwa Ayiti a.
Sekirite, pase men nan Konstitisyon 1987 la ak andedan enstitisyon leta yo, òganize eleksyon nan bon kondisyon, pou retabli diyite fondamantal peyi d Ayiti a, retabli lapè, pou popilasyon an ka viv san kè sote ni zak briganndáy: se ta dwe 3 gwo chantye traváy ekip tranzisyon k ap ranplase gouvènman defakto Ariel Henry an.
Èske peryòd k ap vini an pral pèmèt Ayisyen ranmase karaktè yo tout bon? [gp apr 06/04/2024 14:00]
Consulter +
