Gotson Pierre
Pòtoprens, 29 mas 2024 [AlterPresse] --- Ekonomi Ayiti a se yon katastwòf, dapre ekonomis ak ekriven Leslie Péan.
Nan yon pale ekonomis la fè sou AlterRadio, li dekri yon sitiyasyon kote ekonomi Ayiti a an pàn kwasans depi 5 an san rete.
Peyi a gen defisi nan bidjè, defisi nan komès ak echanj an jeneral ak peyi etranje.
Sitiyasyon ensekirite, vyolans, enstabilite politik ak koripsyon konplike pwoblèm ekonomik yo pi rèd, dapre Leslie Péan.
Sa gen gwo konsekans menm sou transfè dyaspora a ki ede popilasyon an pran yon ti souf.
Pou Leslie Péan, ekonomi an mal jere, ak yon bann depans initil Leta, ki lakòz peyi a mare nan pye tab etranje, patikilyèman enstitisyon entènasyonal yo.
Sitiyasyon sa a kab chanje, si gen volonte ak kouraj pou koupe fache ak yon modèl Leta ap aplike depi apre endepandans peyi a : se sa ekonomis la panse.
Pami liv Leslie Péan ekri, gen yon seri 4 tòm ki travèse tout istwa Ayiti, depi anvan lendepandans, ki rele « Haïti, économie politique de la corruption ». [gp apr 29/03/2024 10 :00]
Consulter +