P-au-P, 09 out 05 [AlterPresse] --- Chofè transpò piblik respekte nan plizyè kwen nan kapital la yon jounen grèv Asosyasyon Pwopriyetè ak Chofè Ayiti (APCH) te mande lendi 8 out la, dapre sa AlterPresse konstate.
Kamyonèt, bis, tap-tap, taksi pat met kò yo deyò ditou nan la ri a. Repotè AltèPrès yo ki te mache nan plizye kwen ki sèvi kòm estasyon machin pat wè okenn machin piblik k ap chaje, jan sa abitye fèt.
Pasaje yo te gen anpil difikilte pou te jwenn kamyonèt oubeyn taksi ki ta ka mennen yo nan akitivite yo abitye fè chak jou.
« Grèv sa se yon reyisit total kapital pou nou », dapre responsab Sendika pwopriyetè ak chofè Delma 33 yo (zòn nòdès kapital), Cambronne Reynold. Li di AlterPresse li kontan pou jan chofè yo mennen mouvman grèv la.
Reynold di li espere mouvman grèv sa ap sèvi yon pinga pou gouvènman, ki pa sispann monte pri gaz la. « Jodi a nou pran responsabilite nou paske nou achte gaz la chè anpil epi nou vann kous taksi a bon mache », daprè sa li di.
Pasaje yo, bò kote pa yo, di yo apiye grèv la kare bare menm si yo pa ka jwenn machin. « Sa deranje lefèt pa gen kamyonèt, men m bay sipò m pou grèv sa a », dapre yon jèn dam AlterPresse poze kesyon.
« Mwen sipòte grèv sa a paske pri gaz la ki monte a pa nan avantaj nou epi m wè gouvènman an pa pran ka nou an konsiderasyon », dapre yon lòt pèsonaj ki t ap tann kamyonèt san li pa kab jwenn.
Lapolis te prezan, jan sa abitye ye, nan kafou ki konn gen pwoblèm. Pat genyen gwo deblozay nan jounen grèv la.
Asosyasyon Nasyonal Distribitè Pwodwi Petwolye yo (ANADIPP) di grèv chofè yo “lejitim†epi li lonje dwèt sou gouvènman ki monte pri gaz la san li pa pran okenn mezi pou sipote popilasyon an.
Pri gaz la jounen jodi a se 143 goud ($3.50 meriken) pou galon 95 oktà n nan, 138 goud ($3.45 meriken) pou galon gazolin 91 oktà n nan epi 103 goud ($ 2.50 meriken) pou gallon diesel la. [jj gp 09/08/05 11:00]
Consulter +
