Par Gotson Pierre
Pòtoprens, 23 mas 2024 [AlterPresse] --- Èske sa nou wè a se sa ? Èske se vre ta gen yon lòt dinamik nan nivo lapolis Ayiti a, annabsans Ariel Henry, premye minis de fakto ki demisyone a ? Limenm ki te jwe wòl prezidan Konsèy siperyè lapolis la.
Feblès lapolis la parèt nan divès nivo. Plizyè espesyalis souliye pwoblèm efektif, ekipman, sitou pwoblèm refleksyon estratejik.
Sa nou te toujou konstate tou, se yon absans inisyativ konsekan anfas avanse gang yo fè, jistan yo vin okipe pifò katye nan kapital la, ak lòt rejyon nan peyi a.
Men, dènye jou sa yo, e an absans Ariel Henry, lapolis la devlope plizyè operasyon ki sanble mete gang yo an difikilte, menmsi yomenm, yo di se pa vre. Dapre fòs lòd yo, gen plizyè tèt ki tonbe. Pami yo 2 gwo chèf gang yo konnen sou non Ti Greg ak Makandal.
Se sèten, sa nou wè la a ta kab reprezante sèlman yon siyal. Èske se sa tout bon ? Se pi devan n ap konnen. [gp apr 23/03/2023 10 :00]
Consulter +