Pòtoprens, 22 mas 2024 [AlterPresse] --- Nan pi piti pase 2 semenn, ant vandredi 8 pou rive mèkredi 20 mas 2024 la, gen plis pase 33 mil moun ki kite lakay yo nan zòn metwopoliten Pòtoprens lan, pou al chèche refij nan vil pwovens yo, akoz zak laterè ak vyolans gang ak zam yo k ap ogmante san gade dèyè, dapre yon dokiman Òganizasyon entènasyonal pou migrasyon yo (Oim) ki vin jwenn AlterPresse ak AlterRadio.
Plis pase 60 pousan fanmi deplase sa yo te rive pran machin transpò piblik pou ale nan depatman Sidès, Sid, Grandans ak Nip. Nan dènye mwa yo, 4 depatman sa yo te deja resevwa plis pase 116 mil moun deplase, ki te sètoblije kite zòn metwopoliten Pòtoprens lan, pou chape anba laterè gang ak zam yo.
Se yon ranmase, nan dat 21 mas 2024 la, Òganizasyon entènasyonal pou migrasyon yo (Oim) ki te pran enfòmasyon sa yo nan 15 estasyon machin transpò piblik yo.
Oim fè konnen, non sèlman pwovens yo pa gen estrikti nesesè yo, men tou kominote pwovens sa yo pa gen ase resous pou akeyi tout mas kantite moun deplase sa yo.
Nou dwe aji san pèdi tan pou met bout nan vyolans gang ak zam yo ak anpeche laterè sa a gaye nan tout teritwa peyi d Ayiti a. Se kout rèl kòdonatris zafè imanitè Nasyon zini yo nan peyi d Ayiti, natif natal peyi Laswèd Ulrika Richardson, nan yon kozman ak laprès sou videyokonferans jedi 21 mas 2024 la.
Ulrika Richardson fè konnen sitiyasyon an konplike anpil nan zòn metwopoliten Pòtoprens la, kote gang ak zam ap simen laterè san gade dèyè. Grangou ak lamizè ap pete fyèl popilasyon an rèd mare.
Kapital peyi d Ayiti a ap fè fas ak yon kriz imanitè ak yon kriz lasante san parèy. Gen difikilte pou jwenn san pou bay malad ki nan bezwen yo. Gen difikilte pou jwenn materyèl anestezi ak lòt medikaman ki pi enpòtan yo, pou báy malad yo laswenyáy nesesè yo. Aryopò entènasyonal la ak ti aryopò Pòtoprens lan fèmen depi koumansman mwa mas 2024 la.
Gen difikilte pou pase sou lanmè, pou al pote èd nesesè yo bay tout sila ki nan bezwen yo. Kriz lan ap angrave, li ka vin pi rèd toujou nan semenn k ap vini yo. Dwe gen dispozisyon ki pran ak aksyon ki fèt rapid rapid, pou evite sa vin pi mal toujou. Se konsiderasyon Òganizasyon mondyal lasante a (Oms). [apr 22/03/2024 22:00]
Photo : Oim
Consulter +
