Gotson Pierre
Pòtoprens, 26 fev. 2024 [AlterPresse] — Anpil enkyetid ap monte nan tout sektè edikatif la ak nan mitan fanmi yo pandan gen gwo danje sou tèt tout aktè nan sistèm edikatif Ayiti a, yon peyi ki plonje nan kriz plizyè dimasyon depi plizyè lane.
Plis pase 1500 lekòl fèmen nan zòn metwopolitèn Pòtoprens la. Se dènye evalyasyon ki fèt nan sektè ansèyman an, san nou pa konte sa k ap pase nan plizyè lòt rejyon tankou nan depatman Latibonit k ap viv yon sitiyasyon terib, patikilyèman akòz ensekirite ak vyolans k ap layite.
Marguerite Clérié, anseyant, direktris lekòl epi prezidant Asosyasyasyon pwofesyonèl lekòl prive, konfime sa pandan li t ap patisipe nan emisyon TiChèzBa, 24 fevriye a, sou AlterRadio 106.1 FM.
Nan dosye lekòl fèmen sa a, nou pa kab bliye tou kriz politik la. Enstabilite sa a ansanm ak tout sa li trennen dèyè l, enstitisyon ki pa egziste, otorite Leta ki plat atè, sa alabaz kriz terib sa a, ki frape sektè edikasyon an fò anpil.
Se klè kontèks kote ti moun yo, jèn yo, ap resevwa pen lenstriksyon, se gwo tèt chaje, jan Marguerite Clérié esplike sa.
Marguerite Clérié bay plizyè ka dramatik k ap pase nan plizyè katye nan Pòtoprens, kote lekòl rete fèmen, oubyen fonksyone jan yo kapab ak anpil jimnastik.
Gen foto ki sikile, ki frape atansyon moun anpil tou.
Ti moun nan men paran k ap kouri pou pa pran bal mawon…
Sitiyasyon kote dirijan lekòl ap ranmase bal mawon nan lakou lekòl…
Sitiyasyon tou anpil paran ak anseyan ki blije kache… Paran pa kab mennen ti moun lekòl, anseyan pa kab al fè kou…
Paran deplase ansanm ak ti moun k ap dòmi nan move kondisyon epi ki kab sibi tout kalte zak…
Lekòl ki oblije demenaje anba menas gang.
Lekòl ki tounen abri pwovizwa e ki pa an mezi pou ofri pen lenstriksyon.
Marguerite Clérié pale sou difikilte pou anseyan fè travay pedagojik yo, pandan ti moun yo yomenm ap rankontre anpil difikilte ki pa mete yo nan kondisyon pou aprann. Rezilta, nivo edikasyon an bese anpil.
Jodi a, kesyon fonksyonman lekòl nan peyi a mande anpil atansyon. Fason aktivite eskolè ap fèt ak kalite edikasyon nan kontèks kriz sa a, mande bon jan refleksyon ak aksyon.
Kouman pou rive fè respekte dwa moun pou jwenn edikasyon nan peyi Ayiti? Kouman pou pwoteje aktivite lekòl ? Kouman pou fè lekòl rete mach eskalye ki pèmèt chak moun amelyore lavi yo nan sosyete a epi amelyore sosyete a? [gp apr 26/02/2024 15:00]
Gade tout emisyon an sou chanèl Youtube AlterPresse-AlterRadio :
Consulter +
