Pòtoprens, 19 fevriye 2024 [AlterPresse] --- Nan mitan jounen lendi 19 fevriye 2024 la, te gen gwo kous kouri nan zòn Nazon, avni Poupla ak zòn ki viwonnen yo, Pòtoprens, nan moman kout bal t ap pati, dapre temwayáy ki vinn jwenn AlterPresse ak AlterRadio. Moun nan zòn sa yo sanble t ap pare pou al leve kanpe kont bri ki ta fè kwè y ap retire ajan polis Brigad operasyon ak entèvansyon depatman an / Boid, ki estannbáy nan Fò nasyonal. Lapolis nasyonal kouri met yon nòt deyò, kote l di se pa vre pa gen desizyon pou retire ajan Boid yo nan Fò nasyonal. Lapolis nasyonal la mande popilasyon an rete tèt frèt, pa pran nan mannèv bri k ap kouri ki ka mete lapolis la tèt anba.
Bandi ak zam asasinen anba bal yon chofè transpò piblik Mibalè/Pòtoprens ak 9 pasaje, epi blese anpil lòt pasaje, dimanch 18 fevriye 2024 la, anba mòn Kabrit. Zak kriminèl sa a estomake moun Mibalè anpil. Asosyasyon pwopriyetè ak chofé d Ayiti yo (Apch), ki konfime kò sasinay sa yo, leve lavwa yon lòt fwa ankò kont zak kriminèl sa yo, gang ak zam ap plede fè sou chofè transpò piblik yo, divès kote sou wout nasyonal yo.
Bandi ak zam Meyè, nan komin Kwadèboukè, ap pare gwo zatrap kont machin transpò piblik, k ap travèse Mòn Kabrit, nan fè alevini ant Pòtoprens ak depatman Plato santral. Chofè machin ak pasaje yo dwe fè anpil atansyon. Se avétisman Asosyasyon pwopriyetè ak chofé d Ayiti yo (Apch) te bay nan dat 9 janvye 2024 sou AlterPresse ak AlterRadio.
Samdi 17 fevriye 2024 la, gang ak zam Savyen yo touye plizyè moun epi boule 3 kamyon ki te pote moun ak machandiz nan depatman Latibonit lan. Se bon pye chofè kaamyon yo, ki fè yo gen tan chape poul yo nan atak gang ak zam Savyen yo, dapre Asosyasyon pwopriyetè ak chofè d Ayiti yo (Apch).
Gang ak zam kokorat san ras yo, ki gen gwo zam nan men yo, ap simen laterè sou wout depatman Latibonit / depatman Nòdwès. Se gwo danje yo vin mete pou tout sila k al lave rad nan Twa Rivyè ak sila k ap enstale dèlko pou pran dlo pou wouze jaden yo. Gang ak zam sa yo mete zatrap nan Ti Bwadòm, toupre komin Gwo Mòn. Yo pase tou nan kabann Twa Rivyè a nan zòn Dlo Pandi, Jolivert ak kafou Tel pou antre nan komin Basen Ble. Yo rive gen siveye rapòte pami chofè motosiklèt, k ap siyale yo tout chofè machin ak pasaje k ap pase sou wout Gonayiv/depatman Latibonit pou ale Pòdpè/depatman Nòdwès, dapre temwayáy ki vin jwenn AlterPresse ak AlterRadio.
Depi plizyè semenn, gen gang ak zam k al simen laterè sou wout Pòdpè, pase Ansafolè pou rive Ti Bouk Obòy, toupre komin Pò Mago, depatman Nò. Gang ak zam sa yo deja atake plizyè chofè k ap eseye evite zòn Ti Bwadòm, ki sou kontwòl gang ak zam Kokorat san ras yo.
Madi 13 fevriye 2024 la, lapolis depatman Nòdwès fè konnen li t al retire barikad bandi ak zam te mete sou wout Ti Bouk Obòy la, pou vare sou sou machin transpò piblik k ap pase yo. Lapolis la pa fè okenn arestasyon, dapre enfòmasyon ki vin jwenn AlterPresse ak AlterRadio.
Zak kriminèl gang ak zam yo ap rapousuiv rèd mare sou teritwa Ayiti a, anba je otorite defakto yo ak lapolis, ki pa fè anyen pou kwape yo.
Gen 51 gwo chabrak jij enstriksyon Walter Wesser Voltaire deside, ki ta dwe al jije douvan yon tribinal kriminèl sou dosye kò sasináy 7 jiyè 2021 an sou Jovenel Moïse lan. Pami 51 chabrak sa yo, gen Martine Joseph Moïse, madanm defen Jovenel Moïse, ansyen premye minis Claude Joseph, ansyen minis enteryè Louis Gonzague Edner Day, ansyen direktè jeneral lapolis la Léon Charles, ansyen responsab Inite sekirite jeneral Palè nasyonal (Usgpn) Dimitri Hérard, ansyen direktè jeneral Ajans nasyonal espas pwoteje yo (Anap) Jeantel Joseph, ak Joseph Félix Badio lapolis nasyonal la te arete Petyonvil nan dat 19 oktòb 2023. Se sa k soti nan desizyon jij enstrisyon Walter Wesser Voltaire.
Gwo dram lendi maten 19 fevriye 2024 nan gran katye Segen, deptman Sidès. Moun nan zòn nann pantan sou kadav, nan yon kay, 16 moun kit e patisipe, dimanch 18 fevriye 2024 l, nan yon antèman. Se gwo emosyon nan gran Katye Segen. Jiska prezan, pèsonn pa rive konnen ki sa k lakoz 16 moun sa yo mouri apre antèman 18 fevriye 2024 la. [ppsf emb rc aapr 19/02/2024 15:30]
Consulter +
