Gotson Pierre
Pòtoprens, 17 fevriye 2024 [AlterPresse] --- Demach yo kontinye pou yon Misyon ame entènasyonal vini an Ayiti pou pote kole anfas gang yo, ki pa sispann fè san koule, mete dlo nan je popilasyon an, lage dezolasyon epi pran plis teritwa, dapre enfòmasyon ki vin jwennn AlterPreese ak AlterRadio.
Sitiyasyon sa a fòse fanmi yo kontinye kouri kite kotę yo rete. 10 mil deplase nan 9 jou sèlman, se dènye kalkil ki fèt.
Nan Washington, semèn pase, se te yon lòt rankont ant reskonsab ayisyen, kenyan ak ameriken, sou fòs Kenya gen pou l dirije an Ayiti a.
Kèk semèn anvan sa, nan koumansman ane a, gwoup espè entènasyonal ki rele « International Crisis Group », prepare yon rapò kote li montre ki gwo defi misyon kenyan ap gen anfas li an Ayiti.
Istoryen Diego Da Rin, espè « International Crisis Group » pou Amerik Latin ak Karayib la, analize dosye a an detay nan emisyon #TiChèzBa sou AlterRadio. Li fè konnen, dapre enfòmasyon li genyen, misyon Kenya a ta dwe deplòtonnen an Ayiti nan pa lontan.
Diego Da Rin souliye misyon an pap fasil. Ap gen anpil difikilte nan divès nivo.
Kesyon ki poze se èske misyon etranje sa a ap kapab bay gang yo yon kanpe lwen tout bon?
Èske gang yo ap rete bra kwaze? Kouman pou rive metrize yo? E apre? Kisa ki kab fèt nan nivo sosyal ak politik sitou pou sekirite ak lapè a tounen yon reytalite nan divès zòn an Ayiti? Pwoblèm nan konplike. Kokenn defi. [gp apr 17/02/2024 11:00]
Consulter +
