Pòtoprens, 8 fevriye 2024 [AlterPresse] --- Gwo kout zam kontinye ap chante tribò babò, jedi 8 fevriye 2024 la, nan plizyè katye zòn metwopoliten Pòtoprens lan. Moun te toujou sou gwo tansyon lannuit mèkredi 7 pou antre jedi 8 fevriye 2024 la.
Depi lendi 5 fevriye 2024 la, akoz laterè gang ak zam, anpil anpil fanmi ap kouri kite kote yo rete nan zòn Sapotiy, Lagrenad ak Ti Sous, komin Kafou.
Jan sa ye depi plizyè jou, sitiyasyon an kontinye mangonmen, jedi 8 fevriye 2024 la, apre jounen senbòl 7 fevriye 2024 la. Komès, lekòl, labank p ap fonksyone nan plizyè komin zòn metwopoliten Pòtoprens lan, kote gen barikad ak divès kalte batanklan.
Mèkredi 7 fevriye 2024 la, yon animatè yon radyo blese ak bal nan komin Gwo Mòn, depatman Latibonit, gang ak zam Ti Bwadòm yo te atake. Sitiyasyon laterè sa a te pouse anpil anpil fanmi sètoblije kite kote yo rete depi lane 1950 yo, pou al chèche refij lòt kote, dapre temwayáy ki vin jwenn AlterPresse ak AlterRadio.
Fèmen wobinèt san an. Sispann fè n ap konte moun ki mouri. San dwe sispann koule menm jan ak kriye, avèk kò sasináy, zak kidnaping ak kadejak, k ap miltipliye nan 3 dènye lane ki sot pase yo nan nan peyi d Ayiti. Se kout rèl monseyè legliz katolik women nan peyi d Ayiti yo, ki mande Ariel Henry pran yon desizyon sajès pou byen peyi a, ki sou menas pou tonbe plat atè.
Malgre mouvman leve kanpe, depi plizyè semenn, kont gouvènman defakto a, ki pa bay okenn rezilta depi plis pase 30 mwa, Ariel Henry pèsiste li p ap ralè kò l. San l pa ka presize kiyès ki ba l otorite ak dwa sa a, li di se limenm ki ta dwe kontinye mennen bak peyi a. Li pwomèt ankò li pral regle pwoblèm laterè gang ak zam yo anvan l al òganize eleksyon, nan yon mesaj anrejistre li bay byen ta lannuit mèkredi 7 pou antre jedi 8 fevriye 2024 la.
Se lagè Ariel Henry deklare peyi a avèk diskou li fè lannnuit 7 pou antre 8 fevriye 2024 la. Se konsiderasyon ekonomis ak plimeyank Leslie Péan, nan yon ranmase li fè sou AlterPresse.
Okap/depatman Nò, Okáy/depatman Sid, Gonayiv ak Sen Mak/depatman Latibonit, Jakmèl/depatman Sidès, Jeremi/depatman Grandans, Miragwán/depatman Nip, Ench/depatman Plato santral, Wanament/depatman Nòdès, Pòdpè/depatman Nòdwès, Ti Gwav ak Gran Gwav sou wout nasyonal nimewo 2 a, Akayè/depatman Lwès, sou yon distans 32 kilomèt nan nò Pòtoprens : se plizyè milye moun, mèkredi 7 fevriye 2024 la, ki te desann nan lari al rele chalbari dèyè gouvènman defakto a, ki gen yon konpòtman manfouben depi plis pase 30 mwa sou kalmite popilasyon peyi d Ayiti a ap sibi.
Mouvman leve kanpe yo kont gouvènman defakto Ariel Henry an pa dwe kanpe ditou sou teritwa Ayiti a. Se kominote entènasyonal la, espesyalman gouvènman Etazini a, ki kenbe premye minis defakto a nan diresyon politik peyi a. Tout sila k ap manifeste nan lari yo ta dwe al estannbáy douvan kay anbasadè peyi etranje ak minis gouvènman defakto yo. Se kout rèl prensipal dirijan pati politik Pitit Desalin nan, Jean-Charles Moïse, ki leve lavwa kont zak britalite lapolis sou manifestan yo, detan l voye senpati pati li an bay fanmi ajan Bsap, lapolis touye ak bal mèkredi 7 fevriye 2024 la.
Mèkredi apremidi 7 fevriye 2024, lapolis nasyonal touye ak bal 5 ajan Brigad siveyans espas pwoteje yo (Bsap) nan Laboul, komin Petyonvil, nan sikonstans ki poko klè. Nan operasyon sa a, lapolis nasyonal la sezi yon machin ak yon motosiklèt, dapre enfòmasyon ki vin jwenn AlterPresse ak AlterRadio.
Ofis pwoteksyonn sitwayèn ak sitwayen yo (Opc) swete yon komisyon endepandan louvri yon ankèt kòmsadwwa, pou fè limyè sou sikonstans ak nan ki kondisyon 5 ajan Bsap mouri anba kout zam lapolis nasyonal la, mèkredi apremidi 7 fevriye 2024 la nan Laboul, komin Petyonvil.
Gouvènman defakto a ta dwe pran tout dipozisyon nesesè pou fè ajan Bsap yo antre anba lòd Fòs lame d Ayiti yo. Se pinga Asosyasyon militè d Ayiti voye báy gouvènman defakto a, pou evite lese frape ant lapolis, ajan Bsap yo ak Fòs lame d Ayiti yo
Yon jenn gason, ki te gen yon zam 38 nan men l, mouri, madi swa 6 fevriye 2024 la, douvan komisarya polis Wanament lan, depatman Nòdès, li te atake ansanm ak anpil lòt asayan ak zam. [pfsf emb rc apr 08/02/2024 14:50]
Consulter +
