Español English French Kwéyol

Anviwónman : Posiblite bon jan aktivite lapli, jis rive finisman semenn nan, sou plizyè depatman peyi d Ayiti yo

Pòtoprens, 7 fevriye 2024 [AlterPresse] --- Gen yon mas lè fret nan zòn lès Repiblik Dominikenm ki lakoz imidite ak lòt kalte boulvès nan tan an, sou gwo zile Karayib yo, jodi a.

Se yon sitiyasyon k ap báy bon jan aktivite lapli, nan aswè ak pandan lannuit lan, jis rive finisman semenn nan, sou depatmn Nòdès, Nò, Latibonit, Nòdwès, Grandans ak Lwès, kotee nou jwenn zòn metwopoliten Pòtoprens lan.

Se avètisman sa a espesyalis ayisyen yo nan kondisyon tan an báy, nan dènye bilten yo a ki vin jwenn AlterPresse ak AlterRadio.

Soti lannuit madi 6 pou rive maten mèkredi 7 fevriye 2024 la, lapli a te tonbe anpil divès kote sou depatman peyi d Ayiti yo, tankou sou plizyè katye nan zòn metwopoiten Pòtoprens lan.

Gen imidite ak nyáj, depi nan maten, divès kote sou depatman peyi d Ayiti yo, tankou sou depatman Lwès la.

Soti nan nivo 30 degre Sèlsiyis, tanperati a pral desann ant 22 pou al 18 degre sèlsiyis, nan aswè.

Tanperati a kontinye fre lannuit yo.

Li fè fret on ti kras nan jou sa yo.

Fredi sa a mande pou tout moun, espesyalman timoun ak granmoun yo, mete rad ki ka kenbe yo cho, pou evite yo trape grip.

Ki jan lanmè a ye jodi a ?

Detan yo va evite rantre nan fon lanmè a, k ap move anpil anpil, kaptenn bato, chaloup, bwa fouye, pipirit yo, dwe pran prekosyon nesesè yo bò tout kòt peyi d Ayiti yo.

Vag yo ap monte nan nivo 12 pye wotè bò kòt Nò yo, 8 pye wotè bò kòt Sid peyi d Ayiti yo ak 6 pye wotè bò kòt zile Lagonav yo, pa twò lwen Pòtoprens. [rc apr 07/02/2024 13:40]