Español English French Kwéyol

Ayiti : Ralantisman nan Pòtoprens ak plizyè lòt zòn nan peyi a, okazyon yon modòd grèv jeneral

Pòtoprens, 29 janv. 2024 [AlterPresse] — Aktivite yo ralanti lendi maten 29 janvye 2024 la, oubyen yo diminye nèt, nan plizyè katye nan kapital la ak plizyè lòt zòn nan peyi a, kote plizyè òganizasyon sendikal lanse yon modòd grèv 3 jou kont laterè gang ak zam yo, dapre konsta AlterPresse.

Rapò ki vin jwenn AlterPresse fè konnen machann pa soti bonè nan zòn Klèsin, nan nò kapital la. Estasyon machin transpò piblik blanch. Fleryo, Kwadèmisyon, Bonrepo, ki pa lwen, se menm sitiyasyon.

Se kèk grenn kamyonèt yo wè nan zòn kafou 3 men, pa lwen Ayewopò entènasyonal Pòtoprens. Wout Ayewopò blanch e yon jan sispèk sispèk. Se kek grenn machin prive ak moto ki genyen.

Kafou Dèlma 33, yo wè kèk moto sèlman.

Sikilasyon ralanti nan zòn Frères, Petyonvil (nan lès kapital la) ak wo Dèlma epi Musseau (pa lwen Petyonvil), dapre konsta AlterPresse fè.

Atmosfè a pa diferan nan Kafou, nan sid kapital la, menm jan ak plizyè rejyon nan pwovens.

Pou bonè maten an, divès aktivite òdinè yo ralanti. Pa gen anpil travayè nan lari, ti komès ak lòt aktivite enfòmèl ralanti tou.

Lekòl tou pa fonksyone nòmalman. Se kèk grenn elèv yo kwaze nan lari ak kèk paran ki fè jefò al depoze timoun yo lekòl.

Pa kont, nan koumansman matine a, plizyè bank louvri pòt yo pou resevwa kliyan ki vin fè tranzaksyon.

Nan divès katye Pòtoprens, tankou sa ye depo yon bon tan, se gwo kout zam ki chante nan nuit la ak bonè maten.

Nan tèt kole ak plizyè lòt òganizasyon, Brigad sendika kont koripsyon lanse yon modòd grèv jeneral soti lendi 29 pou rive mèkredi 31 janvye 2024.

Grèv jeneral sa a, se pou ekzije dispozisyon konsekan pou kwape laterè gang ak zam yo, ki anpeche moun ak machandiz deplase lib e libè sou teritwa Ayiti a. [apr 29/01/2024 10:00]