Pòtoprens, 08 janvye 2024 [AlterPresse] --- Se laterè gang ak zam yo ki prensipal eleman enfòmasyon nan premye jou lane 2024 yo, nan peyi d Ayiti.
Se 15 moun ki mouri asasinen, samdi 6 ak dimanch 7 janvye 2024 la, nan Maryani ak Dèlma.
Plizyè viktim Maryani yo, se te ti machann ki te pran lanmè pou al vann pwodui nan komin Gresye., paske yo pa ka travèse Maryani, sou wout nasyonal nimewo 2 a.
Kidonk, depi premye novanm 2023, ni moun ni machin pa ka travèse Maryani. Koumansman mwa janvye 2024 la, gang ak zam yo rive enstale yon gwo trelè pou bloke pati wout nasyonal nimewo 2 sa a, kote yo anpeche tout ale vini fèt. Chofè machin transpò piblik yo dwe fè anpil atansyon sou zòn teritwa pèdi minis lajistis defakto a te di a. Depi transpò piblik ta paralize nètakole, konsekans yo va grav pou tout sektè nan sosyete a, tankou nan zafè lasante. Se avétisman Asosyasyon pwopriyetè ak chofè d Ayiti yo (Apch) sou AlterPresse ak AlterRadio.
Dimanch 7 janvye 2024 la, yo dekouvri kadav 9 moun sou yon pil fatra nan Dèlma 19, pa twò lwen wout aryopò entènasyonal Pòtoprens lan, dapre enfòmasyon ki vin jwenn AlterPresse ak AlterRadio.
Nan Pòdpè, depatan Nòdwès, yon moun lapolis sispèk kòm asosye gang Twa Rivyè mouri nan boukantáy kout zam ak lapolis, vandredi 5 janvye 2024 la. Lapolis di li arete plizyè lòt sispèk, pami yo 2 frè jimo (2 frè marasa 22 lane) ki konn opere nan gang 400 mawozo nan Kwadèboukè, epi ki sanble ta konn al kache nan Laskawobas, depatman Plato santral, apre yo fin fè zak kriminèl yo a.
Dimanch 7 janvye 2024 la, gang ak zam Gran Grif Savyen yo dappiyanp ankò yon bis transpò piblik nan depatman Latibonit lan.
Pandan tan sa a, gang ak zam Kanayan yo kontinye dechèpiye chofè machin transpò piblik, k ap travèse wout nasyonal nimewo 1 an.
Samdi 6 janvye 2024 la, lapolis nasyonal di li rive lage nan Taba 2 moun, bandi ak zam te kidnape madi 2 janvye 2024 douvan papòt lakay yo. Lapolis la fè konnen li arete youn nan sispèk zak kidnaping sa a epi sezi yon zam.
Vandredi 5 janvye 2024 la, lapolis nasyonal la arete nan Pòtoprens Nico Chérubin, yon jenn gason 29 lane, li jwenn ak yon kat idantifikasyon lapolis plis yon fo zam nan men l.
Nan plizyè katye zòn metwopoliten Pòtoprens lan, gwo kout zam kontinye chante lajounen kou lannuit, san lapolis pa fè anyen pou kwape zak kriminèl sa yo.
Nan yon reyinyon vandredi 5 janvye 2024 la, Kominote peyi Karayib yo (Caricom) di yo gen gwo kè kase sou konsekans laterè gang ak zam yo, k ap angrave rèd mare sitiyasyon peyi d Ayiti a.
Ant vandredi 12 pou rive samdi 20 janvye 2024 la, pral gen aktivite lapriyè sou dram peyi d Ayiti ap viv yo, nan pawas legliz katolik women Altagrás Dèlma. Se yon nevèn pou prepare gwo pwosesyon dimanch 21 janvye 2024 la, ki se fèt Altagras. Responsab legliz katolik women Altagras Dèlma yo ekzije otorite yo pran bon jan dispozisyon pou sekirite ak lapè retabli kòmsadwa sou teritwa Ayiti a. [je ppsf rc apr 08/01/2024 14:00]
Consulter +
