Español English French Kwéyol

Ayiti-Laterè : Yon lòt beny san gang ak zam Maryani yo, 6 janvye 2024 la, sou vwayajè sou lanmè

Pòtoprens, 07 janvye 2024 [AlterPresse] --- Plizyè moun mouri anba bal, anpil lòt blese ak bal tou nan yon atak gang ak zam Maryani yo fè ankò, samdi 6 janvye 2024 la. Gen yon katite lòt moun, gang ak zam Maryani sa yo ta kidnape tou.

Atak 6 janvye 2024 lan fèt sou moun ki t ap eseye vwayaje sou lanmè, ant zòn Lanbi ak komin Kafou, pou evite zatrap gang ak zam sa yo, ki gen kontwòl Maryani, sou wout nasyonal nimewo 2 a, depi mèkredi premye novanm 2023 a, dapre enfòmasyon ki vin jwenn AlterPresse ak AlterRadio

Depi premye novanm 2023, ni moun ni machin pa ka travèse Maryani. Koumansman mwa janvye 2024 la, gang ak zam yo rive enstale yon gwo trelè pou bloke pati wout nasyonal nimewo 2 sa a, kote yo anpeche tout ale vini fèt.

Chofè machin transpò piblik yo dwe fè anpil atansyon sou zòn teritwa pèdi minis lajistis defakto a te di a. Depi transpò piblik ta paralize nètakole, konsekans yo va grav anpil pou tout sektè nan sosyete a, tankou nan zafè lasante. Se avétisman Asosyasyon pwopriyetè ak chofè d Ayiti yo (Apch) sou AlterPresse ak AlterRadio. [apr 07/01/2024 11:00]