Pòtoprens, 19 oktòb 2023 [AlterPresse] --- Se trafikan Repiblik Dominiken ki vann gang ak zam Ayiti yo zam ak bal ki soti nan peyi Etazini, apati gwo rezo raketè, polisye, fonksyonè Leta ak moun ki pre otorite yo, ki kore pratik pase ak zam ak bal sou fwontyè, tankou Beladè, depatman Plato santral.
Se souvan nan peyi Etazini zam ak bal, ki antre Ayiti dèyè do lalwa yo, soti. Zam ak bal sa yo pase Repiblik Dominiken anvan yo rantre Ayiti.
Se sa gwoup espè Nasyon zini yo sou peyi d Ayiti ekri nan rapò yo rann piblik nan dat 18 oktòb 2023 a.
Gwoup espè Nasyon zini yo lonje dwèt sou ansyen prezidan Joseph Michel Martelly, ansyen senatè Youri Latortue, ansyen depite Prophane Victor ak biznismann Reynold Deeb kòm gwo chabrak k ap soutni gang nan peyi d Ayiti.
Madi 8 novanm 2022, milite dominiken te arete Midrène Manessa Milien, ki se madanm delege an apre Beladè a, Yvanosky Joachin, detan l ta pral travèse fwontyè Comendador, pwovens Elías Piña, bò komin Beladè a. Militè dominiken yo te jwenn nan machin madanm nan yon gwo chajman plis pase 22 mil katouch.
3 jou apre, kidonk lannuit vandredi 11 novanm 2022 a, nan nivo Mòn Kabrit, pa twò lwen komin Kwadèboukè, lapolis nasyonal di li arete youn nan enspektè l, Wakin Pierre, ki t ap travay nan Palè nasyonal. Yo te jwenn nan machin Wakin Pierre, ki te soti Beladè, ba Plao santral, plis pase 4 mil katouch kalib 5.56 milimèt, anpil lòt katouch ak chajè, avèk plis plizyè plis pase 9 san mil goud. Se Beladè Wakin Pierre te soti ak katouch ak batanklan zam sa yo.
Jis rive mwa oktob 2023 a, popilasyon an pa konnen ki suivi ni lajitis dominiken ni lajistis Ayiti fe sou 2 dosye trafik zam ak bal mwa novanm 2022 yo. [ppsf rc apr 19/10/2023 15:50]
Consulter +
