Haiti
Atik

Haiti : Moun pa dwe janm jwe ak menas mèsenè sidafriken


Ekri jou mèkredi 3 out 2005

Pòtoprens 3 out 2005 [AlterPresse] --- Menas lanmò malfèkté Sidafriken ki pandye sou do sitwayen ak sitwayèn an Ayiti parèt pi serye chak jou piplis, ak dènyè enfòmasyon k ap sikile nan sous nouvèl Afrikdisid ki fè konnen yon gwoup mèsenè ta ap tante fè yon operasyon an Ayiti.

Espesyalis kanadyen François Lecuyer ki t ap kòmante nouvèl la pou AlterPresse fè konnen nan dat 2 out « moun pa dwe janm neglije menas mèsenè sidafriken ».

Se lig fòs espesyal sidafriken ki te gaye nouvèl prezans mèsenè sa yo atravè mesaj kopi yon mesaj li te voye bay manm li epi ki al jwenn ajans sou Entènèt « News24 » ki tabli nan Afrikdisid.

Lig la di li kondane davans tout zak malonèt manm li yo ta komèt epi li mande yo pou kanpe sou plan y ap pare pou ekzekite a.

« Mèsenè sidafriken deja patisipe nan ampil activite dwòl nan peyi Afrik yo », dapre sa espesyalis Lecuyer souliye. Yo kite tras yo nan Zanbi, Angola, Etyopi, Botswana, Namibi ak Syera leyone.

Sa gen plis pase yon mwa depi prezidan Chanm Kòmès ak Endistri Peyi dAyiti a (CCIH) Réginald Boulos te siyale zak asasinay aktivis sidafriken ta gen pou fè sou kèk komèsan ak politisyen an Ayiti. Selon Regilnald boulos, fòsfènwa sa yo ta ap travay sou pewòl ansyen prezidan ayisyen an Jean Bertrand Aristid ki nan kanpe lwen nan peyi Afrikdisid.

Jiska prezan, otorite an Ayiti poko pwononse yo sou dènyè enfòmasyon sa yo. [lf gp apr 03/08/2005 10:00]