Mibalè (Ayiti), 26 septanm 2023 [AlterPresse] --- Nan tèt kole ak popilasyon an, lapolis nasyonal la rive touye, madi 26 septanm 2023 a, 9 endividi ak zam ki te vin atake moun Sodo ak Mibalè, depatman Plato santral, dapre enfòmasyon ki vin jwenn AlterPresse ak AlterRadio.
Gen 6 bandi popilasyon an pase alenfinitif, nan sa yo rele operasyon Bwa kale an nan vil Mibalè, dapre ansyen depite Abel Descollines ki t ap pale ak AlterPresse ak AlterRadio.
Li fè konnen tou, nan boukantay kout zam ak lapolis nan komin Sodo, gen 3 lòt bandi ak zam ki mouri.
Depi anvan jou madi 26 septanm 2023 an, tansyon te wo nan komin Mibalè, kote bandi ak zam t ap tire gwo kout bal. Sa ki te lage gwo van panik ak kè sote lakay anpil anpil moun Mibalè.
Bò 2 zè di maten, madi 26 septanm 2023 a, endividi ak zam t al tire anpil bal sou Lopital Mibalè a. Imaj ki disponib yo montre anpil twou bal ki fè pakèt dega nan plizyè sal andedan Lopital Mibalè a.
Moun Mibalè rive konte plis pase 150 douy bal douvan Lopital Mibalè a. Erezman, pa t gen malad ni lòt moun ki travay andedan lopital la ki te blese.
« Jounen madi 26 septanm 2023 a pase tankou yon jou kote pa t gen traváy nan Mibalè. Lekòl yo pa t fonksyone. Plizyè direksyon lekol te pran dispozisyon pa louvri pòt lekòl yo, lè yo konsidere pawòl ki te fè kwè gen bandi ak zam, ki t ap eseye al kache nan lekòl ak legliz nan zon nan. Pi fò biznis te rete ak pòt femen tou, Tout aktivite yo te paralize ».
Se esplikasyon ansyen depite Abel Descollines bay AlterPresse ak AlterRadio.
Gen nan moun Mibalè yo ki te sètoblije pran kouri al refijye nan lòt zon nan depatman Plato Santral la, pou yo ka chape anba laterè gang ak zam yo.
Moun komin Mibalè ret mobilize nan chèche bandi ak zam ki ta sere divès kote nan vil la, dapre
Pandan atak sa yo, lapolis nasyonal la di li rive sezi plizyè zam gwo kalib ki te nan men bandi ak zam yo.
Lendi apremidi 25 septanm 2023 a, gang ak zam yo te retounen al simen laterè pi rèd, antre nan mache piblik, dechèpiye moun nan komin Sodo, yo te deja mete tèt anba ak kò sasináy sou 11 moun, plis lòt kalte vyolans, lannuit vandredi 22 pou antre samdi 23 septanm 2023 a. Se sa Konsèy ekzekitif enterimè Sodo a konfime bay AlterPresse ak AlterRadio.
Bandi ak zam, ki soti Kanayan ak Ti Tanyen, te retounen al simen brigandáy nan komin Sodo, lendi apremidi 25 septanm 2023 a, malgre lapolis depatman Plato santral te fè konnen, dimanch 24 septanm 2023 a, li voye ajan Inite depatman an pou kenbe lòd (Udmo) nan komin Sodo.
Anpil kesyon ap poze poukisa lapolis nasyonal pa t gen tan pran dispozisyon nesesè pou anpeche gang ak zam yo al atake ankò Sodo epi vin simen latwoubláy nan komin Mibalè.
Se ta yon chajman zam ak bal, ki ta soti nan peyi Repiblik Dominiken pou al jwenn gang ak zam yo, ki ta disparèt, dapre sa k ap pale yo.
Kouman fè zam, bal ak lòt batanklan fè kontinye ap pase sou fwontyè ak Repiblik Dominiken an, san pa gen bon jan dispozisyon pou anpeche trafik zam ak bal sa yo?
Ni lapolis nasyonal ni otorite defakto yo rete ap founi je yo gade gang ak zam k ap simaye divès kote sou teritwa nsyonal l, san yo pa fè anyen pou kwape yo.
Akoz vyolans gang ak zam yo, se plizyè plizyè milye fanmi ki sètoblije ap kouri, depi plizyè mwa, kite kote yo te rete pou al chèche refij lòt kote. [jep rc apr 26/09/2023 18:34]
Consulter +
