Pòtoprens., 30 jiyè 05 [AltèPrès] --- Yon gwoup bandi ak zam kidnape 28 jiyè nan maten nan Pòtoprens yon gwo bizisman Koredisid. Se « Korea Times » ak ajans près chinwa « Xinhua » ki mete nouvèl la deyò 29 jiyè sou sit entènèt yo. 2 medya sa yo site yon kominike Ministè afè etranjè Koredisid.
Dapre kominike a, kidnapè yo mande yon gwo kantite lajan pou yo ka lage bizismann lan moun konnen sou ti non jwèt Suh.
Misyon Nasyonzini pou estabilize Ayiti (MINISTA) ak Polis nasyonal Ayiti (PNH) deja mete kanpe yon ekip kap mennen nan tèt kole yon ankèt sou zak dappiyanp sa a.
Bandi yo te kidnape Suh, ki se visprezidan yon konpayi koredisid ki espesyalize nan fè rad, nan moman misye ta pral nan travay li.
Dapre Kim Sung-hyo, yon responsab ministè afè etranjè Koredisid ajans chinwa « Xinhua » site, konpayi mesye Suh a ap negosye ak kidnapè yo pou wè si yo ta lage bizismann lan.
Apre zak kidnapping sa a, anbasadè Koredisid la nan Ladominik, ki reprezante peyi l tou an Ayiti, pat pran tan pou rele otorite ayisyen yo pou mande yo pran tout mezi ki nesesè pou pwoteje sitwayen Koredisid yo ki an Ayiti. Gen apeprè 10 sitwayen Koredisid kap viv an Ayiti.
Zak kidnappinp kap fèt an Ayiti depi plizyè mwa pa epaye etranje. Nan mwa jen pase, bandi te kidnape yon sitwayèn peyi Kanada Hugette Goulet epi kenbe l an otaj pandan twa jou. Kidnapè yo ta pral lage madan Goulet apre yo te fin resevwa lajan yo tap mande a.
Nouvo ka kidnapping sa a reprezante yon move kou pou Lapolis ayisyen an ak Fòs Nasyonzini an (MINISTA).
Nan yon konferans pou laprès 28 jiyè, MINUSTA te montre li satisfè poutèt ensekirite a te fè yon ti bese dènye jou sa yo nan Pòtoprens. Dapre lyetman kolonèl Elouafi Boulbars, youn nan pòtvwa Misyon an, amelyorasyon sa a se rezilta divès operasyon ak patwouy MINISTA, lajounen kou lannwit, nan zòn ki cho yo nan Pòtoprens. Operasyon sa yo, dapre lyetnan kolonèl la, pèmèt yo libere anpil moun bandi te kidnape epi arete yon ventèn nan bandi yo.
Pòtvwa Polis nasyonal Ayiti a (PNH), Gessie Cameau Coicou, nan yon chita pale ak laprès menm jou a di li pataje konsta Fòs Nasyonzini an fè sou sitiyasyon sekirite a nan Pòtoprens. Men ni PNH ni MINISTA rete kwè sitiyasyon an toujou difisil e yap rete vijilan pou yo kapab mete plis sekirite nan peyi a. [vs rl apr 30/07/05 14:10]
Consulter +
