Ayiti : la jistis tande chèf gwoup lavalas pwennfèpa Paul Raymond

Pòtoprens, 29 jiyè 05 [AlterPresse] --- Kabinè enstriksyon nan Pòtoprens tande 28 jiyè a chèf gwoup lavalas pwennfèpa Paul Raymond otorite Repiblik Dominikèn te fouke epi pimpe tounen an Ayiti 22 jiyè pase a.

Paul Raymond ta gen men l trampe nan tout zak vyolans k ap depafini ak peyi a depi lè operasyon Bagdad la derape nan kapital la 30 septanm 2004. Zak kriminèl yo pote ale lavi plis pase mil moun, dapre plizyè òganis ayisyen k ap defann dwa moun.

Gen lòt akizasyon ki tombe sou do ansyen chef youn nan baz Fanmi Lavalas, pati politik ansyen prezidan Jean Bertrand Aristid la. Lajistis pale sou asosyasyon malftéktè, zak maspinay sou popilasyon sivil la, eksetera.

Aavoka k ap plede kòz Paul Raymond an, Lionel Joseph, voye jete tout repwòch otorite lajistis yo fè kliyan li a.

Se jij Mimose Janvier ki t ap tande Paul Raymond nan kabinè enstriksyon an. Semèn k ap vini an, chef baz lavalas la dwe tounen devan jij la pou reponn lòt keksyon. [lf gp apr 29/07/05 10 :00]