P-au-P., 25 jiyè 05 [AlterPresse] --- Moun ki gen laj pou vote mase pa milye devan biwo enskripsyon elektoral nan tout peyi a pou retire kat elektoral yo nan okazyon jounen nasyonal enskripsyon 24 jiyè 2005 la.
“Se yon gran jounen pou konsey elektoral la e rezilta yo ap ekstròdinè†, dapre deklarasyon direktè operasyon elktoral la, Pierre Richard Duchemin, fè nan laprès. Konseye elektoral la pat an mezi bay kantite moun ki rive enskri nan okazyon an.
Aktivite enskripsyon yo kontinye prèske menm jan jounen lendi 25 jiyè 2005 la.
Nan divès sant AlterPresse te vizite, lekòl majistrati wout frè (Nòdès Pòtoprens), biwo komisaria polis nan Delmas 60 (lès) biwo nan lokal Konsey Elektoral Pwoviswa (KEP) a eksetera, nou te remake detèminasyon ayisyen ak ayisyèn ki nan liy pou al fè kat.
Sepandan, gen moun ki montre yo fristre poutèt kantite tan yo pran nan liy pou yo rive fè kat la. Anba yon gwo soley cho, sitwayen ak sitwayèn yo te pase plis pase dezèd tan kanpe pou rive fè kat la, k ap dire 10 zan.
Nan Pòtoprens, pi gran sant enskripsyon an te tabli nan Kafou Fèy, plas jeremi (Sidès capital la). Laprès te ka remake yon gwo dispozitif sekirite ant ajan Misyon Nasyonzini pou Estabilizasyon an Ayiti (MINUSTAH) ak Polis Nasyonal la.
Gwo opalè t ap bouyi mizik pou mete animasyon pandan jounen enskripsyon an.
9 dawou, se dat KEP a kenbe pou mete fen nan operasyon enskripsyon yo. Premy minis Gérard Latortue fè konnen gen posiblite pou peryòd enskripsyon an lonje rive mwa septanm.
Anvan dat 24 jiyè a, se 6 san mil moun anviron ki te enskri, sou anviwon 4,5 milyon moun ki gen pou enskri.
22 jiyè, ministè kondisyon fanm ak dwa fanm te deja òganize yon jounen enskripsyon pou medam yo nan lokal ministè a menm. [fl gp apr 25/07/2005 16:30]
Consulter +
