Pòtoprens, 26 jiyè 2005 [AlterPresse] --- Gouvènman Kanada ak Pwogram Nasyon Zini pou Devlopman (PNID) siyen jounen 26 jiyè nan Pòtoprens yon Pwotokòl Antant ki vo 2.8 milyon dola meriken pou finanse yon pwojè devlopman lokal nan depatman Nòdès peyi Dayiti.
Pwojè ki fèt nan tèt kole ak Fon Ekipman Nasyon Zini (FENI) sila se Ajans Kanadyèn pou Devlopman Entènasyonal ki finanse l. FENI, li menm, ap bay 2.5 milyon biyè vèt pou konplete bidjè pwojè tounèf sa ki prevwa pou yon peryòd 4 lane konsa, kidonk sòti 2005 pou rive 2009, se sa Adama Guindo, reskonsab PNID nan peyi Dayiti fè konnen.
Adama Guindo kontan anpil pou jès sa a peyi Kanada fè a. « Se premye peyi ki te mete 7 milyon dola kanadyen sou tab pou demare pwosesis elektoral la ann Ayiti. Mwen kontan jès la anpil e se yon koperasyon ki pèmèt kondisyon lavi popilasyon ayisyèn chanje », daprè kowòdonatè rezidan Nasyon Zini an.
Bò kote pa l, François Montour, chèf koperasyon peyi Kanada an Ayiti, di li pa gen mo pou l esprime kontantman l lè li wè kijan popilasyon Nòdès ap travay pou devlope lakay yo.
« Mwen konsyan anpil. Devlopman riral la jwe yon gwo wòl an Ayiti e li enpòtan pou tout moun mete ansanm pou fòse popilayson an tounen nan viv nan zòn sa yo. Retou sa kapab fèt nan tèt kole ak tout sektè yo », dapre François Montour.
Apiye gouvènans lokal nan depatman Nòdès peyi Dayiti se yon pwogram kap fèt nan komin Kapotiy, Wanament, Montòganize ak Karis. Li dwe pèmèt anviwon 100.000 moun rive dechouke lanmizè, jwenn manje pou yo manje, jwenn tout kalite sèvis ki genyen.
Jiskaprezan, Kanada se sèl peyi ki respekte pwomès li te fè Ayiti nan gwo woumble ki te fèt nan Wachintonn an jiyè 2004. gouvènman kanadyen an te pwomèt lap bay 180 milyon biyè vèt pou konplete 1.3 milya dola Ayiti bezwen pou yo rekonstwi l. [do apr 26/07/05 17 : 00]
Consulter +
