Pòtoprens, 24 avril 2024 [AlterPresse] --- Plis pase 130 moun mouri nan vyolans gang nan 10 jou nan Pòtoprens ak Kabarè (nò kapital la), dapre adisyon chif AlterPresse fè apati bilan ki soti bò kote Nasyonzini ak òganizasyon dwa moun an Ayiti.
Ant vandredi 14 pou rive mèkredi 19 avril 2023, apeprè 70 moun, pami yo 18 fanm ak pou pi piti 2 timoun, mouri, plis 40 lòt blese anba bal oswa katyapika, nan lese frape ki genyen ant gang ak zam yo nan Site Solèy, espesyalman nan katye Brooklyn, kote moun pa ka soti akoz vyolans ak laterè gang ak zam yo. Se kout rèl Biwo Òganizasyon Nasyon zini pou zafè imanitè, yo plis konnen sou non Ocha.
Yon lòt bò, anplis 8 moun, pami yo 3 ti bebe, ki mouri neye yo, gen pou pi piti 50 moun ki pèdi lavi yo, nan lòt masak, gang ak zam yo sot al fè ankò, semenn pase, nan lokalite Sous Matla, 3zyèm seksyon kominal Kabarè, san lapolis pa t rive pote yo sekou. Se dènye chif, ki vin jwenn Rezo nasyonal k ap defann dwa moun yo (Rnddh), ki pale ak AlterPresse/AlterRadio.
Dènye masak, gang ak zam yo al fè ankò sou moun Sous Matla yo, dwe soulve kòlè ak endiyasyon tout popilasyon peyi d Ayiti a, ki dwe ekzije demisyon gouvènman defakto a, ki p ap regle anyen ditou. Se dizon, sou AlterPresse/AlterRadio, òganis Gadyen dwa moun yo.
Se plizyè milye moun, k ap kouri kite kote yo te rete yo, akoz laterè gang ak zam yo ap simaye, nan zòn metwopoliten Pòtoprens lan, depi plizyè mwa, san lapolis pa rive frennen yo.
Depi lè kominote entènasyonal la fin mete Ariel Henry, nan direksyon politik peyi d Ayiti a, ak yon tweet, nan mwa jiyè 2021 an, gen plis moun, k ap mouri nan plizyè masak, pase sou reny Jovenel Moïse la, dapre konsiderasyon (Rnddh). [apr 24/04/2023 05:00]
Consulter +
