Pòtoprens, 14 avril 2023 [AlterPresse] --- Finisman semenn sa a, ap toujou gen bon jan aktivite lapli, ki mache ak loray, divès kote, dapre sa AlterPresse li nan dènye bilten espesyalis ayisyen yo nan kondisyon tan an.
Kantite lapli ak loray sa yo ap fè tè yo resevwa plis dlo, pase nesesè.
Sa ki fè dlo yo pral debòde, dlo yo ka desann bridsoukou anpil kote nan peyi d Ayiti, sitou nan depatman Latibonit, Nip ak Lwès, kote nou jwenn zòn metwopoliten Pòtoprens lan.
Se pou sa, tout sila, ki rete nan zòn difisil yo, nan zòn malè pandye yo, kote ki ka gen inondasyon yo, tout moun nan zòn sa yo dwe veyatif anpil, respekte konsiy sekirite yo, nan moman lapli ak loray sa yo.
Se avetisman sa a, espesyalis ayisyen yo nan kondisyon tan an bay, pou finisman semenn sa a, sou peyi d Ayiti.
Mas lè a toujou chaje ak imidite epi gen lòt boulvès nan tan an, sou gwo zile Karayib yo, finisman semenn sa a.
Se yon sitiyasyon, k ap lakoz bon jan aktivite lapli byen fò, k ap mache ak loray, nan finisman apremidi ak aswè, jis samdi 15 avril 2023 a, sou depatman Nòdès, Nò, Plato santral, Latibonit, Sidès, Grandans, Nip ak Lwès, kote nou jwenn zòn metwopoliten Pòtoprens lan.
Jan sa ye, depi koumansman mwa avril 2023 a, lapli a te tonbe anpil, byen fò, sou plizyè katye, nan depatman lwès la, lannuit jedi 13 avril 2023 a.
Gen nyaj, divès kote, sou depatman peyi d Ayiti yo, depi nan maten rive nan finisman apremidi.
Tan an ap fèmen nan aswè.
Soti nan nivo 33 degre Sèlsiyis, tanperati a pral desann, ant 24 pou al 21 degre Sèlsiyis, nan aswè.
Kaptenn bato, chaloup, bwa fouye yo, va toujou pran prekosyon nesesè yo, sou lanmè a, bò tout kòt peyi d Ayiti yo.
Vag yo ap monte nan nivo 6 pye wotè bò kòt Sid yo ak 5 pye wotè bò kòt Nò peyi d Ayiti yo. [rc apr 14/04/2023 14:00]
Consulter +
