Pòtoprens, 23 mas 2023 [AlterPresse] — Panik, briganday nan Pòtoprens, manifestasyon nan Kanada kont Biden…
1. Apremidi jedi 23 mas 2023 a, te gen gwo kous kouri sou Dèlma a ak nan sant vil Pòtoprens lan, akoz gwo kout zam k ap chante bridsoukou, nan plizyè katye
2. Jan sa ye depi plizyè mwa, otorite yo pa pote okenn repons, douvan degenn gang ak zam yo, k ap rapousuiv atak ak zak briganday yo, nan anpil komin zòn metwopoliten Pòtoprens lan, kote kout zam yo lage gwo kè sote
3. Moun Nan Baradè, depatman Nip peyi d Ayiti, rele anmwe douvan degenn bandi ak zam, k ap chèche anvayi komin nan, menm jan sa fèt divès kote sou teritwa nasyonal la, dapre temwayay ki vin jwenn AlterPresse ak AlterRadio
4. Mèkredi 22 mas 2023 a, lapolis nasyonal la di li arete Pon Sonde, depatman Latibonit, Erline Destin, li sispèk ki se madanm Lucson Elan, chèf gang Gran Grif nan Savyen an, sou baz divès eleman enfòmasyon, dapre pakè tribinal sivil Sen Mak la
5. Akoz sitiyasyon ki genyen kounye a, fakilte metsin Inivèsite katolik women « Notre Dame d’Haïti » di li p ap resevwa etidyant ak etidyan, nan sal klas yo, ant mèkredi 22 pou rive lendi 27 mas 2023 a. Men, l ap rapousuiv bay kou yo, apati Entènèt
6. Jan sa te prevwa, sou inisyativ òganizasyon Solidarite Kebèk Ayiti, ak solidarite natif natal plizyè peyi, anpil moun manifeste, jedi apremidi 23 mas 2023 a, douvan anbasad peyi Etazini nan Ottawa, kapital peyi Kanada, kont prezidan ameriken an Joe Biden ak kont gouvènman defakto a, ki okipe direksyon politik peyi d Ayiti a, san lalwa pa ba l dwa pou sa
7. Kominote entènasyonal la ap kontinye gade ki posiblite, pou ta fè yon fòs militè vin deplòtonnen nan peyi d Ayiti. Deklarasyon Anthony Blinken, sekretè leta ameriken an, ki anchaje diplomasi gouvènman peyi Etazini a, nan moman Joe Biden ap chita pale, nan Ottawa, ak premye minis Kanada a, Justin Trudeau
8. Madi 21 mas 2023 a, yon tribinal federal nan Boston peyi Etazini, kondane ansyen majistra (peryòd 2006 rive 2010) Lèziwa a, depatman Grandans lan, Jean Morose Viliena, pou l peye yon dedomajman 15 milyon 500 mil dola ameriken. Jijman sa a, kont Jean Morose Viliena, ki deja nan prizon, se paske lajistis ameriken nan Boston jwenn li te fè asasinen, maspinen moun ak mete dife kriminèl lakay yon seri moun Lèziwa, ak lòt vyolans politik, nan finisman lane 2000 yo. Lajistis ameriken di tou misye te bay manti pou l ka jwenn rezidans nan peyi Etazini
9. Ranfòse travay odit ak kontablite nan peyi d Ayiti. Se objektif yon pwotokòl akò, Bank santral peyi d Ayiti (bank tout bank yo) siyen, mèkredi 22 mas 2023 a, avèk Lòd kontab agreye peyi d Ayiti yo (Ocpah)
10. Sou demann pati politik, ki pot non Lòd demokratik la, li di ki te ekri l, Ofis pwoteksyon sitwayèn ak sitwayen yo (Opc) deklare li pran angajman pou pran kontak ak divès sektè ki konsènen nan peyi d Ayiti. Objektif : jwe wòl mitan jwèt, fè kowòdinasyon yon woumble wo nivo sou sekirite nan peyi d Ayiti
[jep rc gp apr 23/03/2023 20:00]
Consulter +
