Pòtoprens, 19 mas 2023 [AlterPresse] — Laprès an dèy, Baryè lib pou vyolans gang, pwomès sekirite Ariel Henry, kriz anviwonman…
1. Jounalis Ruben Dumont, chèf redaksyon ajans sou entènèt Vant bèf enfo, mouri anba maladi, vandredi 17 mas 2023 a, nan Boston (peyi Etazini), apre yon seri operasyon li te sibi nan kou l.
2. Samdi 18 mas 2023 a, tansyon an te rapousuiv nan plizyè katye komin Petyonvil la (tankou Doko, Dyèg, Morèt, Meyòt, Kòlèt), kote bandi ak zam t ap tire anpil kout zam. Menm samdi 18 mas 2023 a, te gen panik tou nan sant vil Pòtoprens lan, ak gwo bri kout zam ki t ap chante, san lapolis pa t fè anyen pou kwape zak za yo.
3. Vandredi 17 mas 2023 a, 2 moun mouri, lè bandi ak zam atake kominote Malik, nan Petyonvil, kote yo met dife nan 19 machin ak plizyè kay., dapre temwayay, sou AlterPresse/AlterRadio, jounalis Cossy Roosevelt, ki gen machin ni boule tou.
4. Jedi 16 mas 2023 a, bandi ak zam, ki bay tèt yo non Kokorat san ras, kidnape, nan Lestè, depatman Latibonit, 6 anplwaye konpayi Ti Malis, ki nan pwodiksyon diri.
5. Vandredi swa 17 mas 2023 a, bandi ak zam kidnape Lebrun Saint-Hubert, direktè jeneral Radyo Kominote ayisyen an (yo plis konnen sou non RCH 2000 lan), nan zòn Dèlma, pa twò lwen estasyon radyo sa a.
6. Samdi 18 mas 2023 a, yon gwoup endividi, ak zam lou nan men yo, al dappiyanp yon machin Leta, Toyota Land Cruiser, koulè blanch, plak SE 06165, andedan fakilte agwonomi a menm, nan Damyen.
7. Apre zak piyay, bandi ak zam t al fè, jedi 16 mas 2023 a, nan otèl plaj Wahoo Bay Beach club, ministè touris deklare gouvènman defakto a pral pran dispozisyon pou retabli sekirite, nan zòn kote touris ta sipoze vini anpil yo.
8. Premye minis defakto a, Ariel Henry, pwomèt ankò l ap retabli sekirite nan peyi a, nan yon vizit li te fè nan katye jeneral lame a, moun yo rele lame po bannnan nan, Jovenel Moïse te di li remobilize, san okenn lwa, nan mwa novanm 2017.
9. Kriz lan pèsiste rèd mare nan peyi d Ayiti. Sa ki rann difisil lavi popilasyon an, k ap pèdi lespwa, chak jou pi plis. Se dizon sosyològ ayisyen Ilionor Louis, nan emisyon TichèzBa sou AlterRadio, 106.1 Fm.
10. Depi mwa janvye 2023 a, gen yon gwo ratman dlo pou bwè ak dlo pou divès aktivite, nan komin Kòniyon/Gran Bwa, depatman Lwès peyi d Ayiti a, dapre kout rèl, sou AlterPresse/AlterRadio, moun nan zòn nan.
11. Li nesesè pou yo deklare ijans nan aviwònman an, pou pwoteje forè yo ak tout lòt espas anviwonman yo, ki merite bon jan pwoteksyon nan peyi d Ayiti yo. Se dizon òganizasyon Pwomosyon pou devlopman (Promodev), ki swete pase men fèt nan ministè anviwonman an, depi nan minis pou rive nan direksyon teknik yo, detan yo va pèmèt Komisyon plizyè ministè ki okipe de amenajman teritwa nasyonal la rive fè travay li kòmsadwa.
12. Gen yon chajman gazolin ak diesel, ki rive, jedi 16 mas 2023 a, nan peyi d Ayiti, dapre sa Biwo ki anchaje fè pwogram èd yo bay lajan (Bmpad) fè konnen sou kont Twitter l.
[jep rc gp apr 19/03/2023 23:00]
Foto : kopi ekran
Consulter +
