Pòtoprens, 13 fevriye 2023 [AlterPresse] — Kidnapin nan legliz, ensekirite an pwovens, operasyon lapolis, rakèt, Caricom…
1. Dimanch 12 fevriye 2023 a, gang ak zam kidnape 3 fidèl premye legliz batis Pòtoprens lan, douvan paking legliz la.
2. Lannuit dimanch 12 pou antre lendi 13 fevriye 2023 a, 4 moun, pami yo yon fanm, mouri, nan Sarazen, Mibalè, Ba plato santral, nan boukantay kout zam ak lapolis, ki rive pran yon fizi Ar15, sou 2 zam li sezi.
3. Lapolis nasyonal d Ayiti a fè konnen li toujou ap rapousuiv operasyon, li tanmen depi dimanch 5 fevriye 2023 a, kont gang ak zam Vitelhomme Innocent yo, nan Pènye ak Tòsèl, nan lès Pòtoprens.
4. Madi 14 fevriye 2023 a, ap gen yon mach pwotestasyon, nan lari Pòtoprens, kont zak kidnaping, espesyalman sa ki fèt, depi vandredi 3 fevriye 2023 a, sou jounalis Jean Thony Lorthé ak 2 lòt moun, sou inisyativ Rezo gwoup san negatif yo (Renagsang), nan tèt kole ak manm laprès yo, ki ekzije yo lage prese prese jounalis Lorthé ak 2 lòt moun yo.
5. Òganizasyon SOS Jounalis leve lavwa kont sa l konsidere tankou yon kanpay pèsekisyon, kèk otorite politik ak lajistis ta deside fè kont yon seri travayè laprès, akoz enfòmasyon oswa kòmantè yo ta fè sou divès kozman, nan kad ekzèsis metye a.
6. Gen yon ekip raketè, k ap eseye pran lajan nan men natif natal Ayisyen, swadizan pou yo ta ba yo sipò, pou yo ta enskri nan nouvo pwogram Joe Biden nan, k ap akeyi plizyè migran 4 peyi (Ayiti, Kiba, Nikaragwa ak Venezyela), dapre temwayaj televizyon ABC news ranmase.
7. Gade ki jan yo ka pote kole ak pèp ayisyen an, nan sa ki arevwa ak pwòp desizyon natif natal Ayisyen yo, yomenm, sou kesyon sekirite, zafè politik ak kozman imanitè. Se demanch sa a, plizyè dirijan politik zile Karayib yo, ki andedan Kominote peyi Karayib yo (Caricom) di, yo pral fè, nan 44 triyèm woumble Caricom, nan Naso, Bahamas, ant mèkredi 15 pou rive vandredi 17 fevriye 2023 a.
Virewon aktyalite Ayiti, 12 fevriye 2023
1. Depi finisman mwa desanm 2022 a, moun nan seksyon kominal Baradè yo gen gwo difikilte pou jwenn dlo pou bwè ak dlo pou tout lòt bezwen natirèl yo, dapre temwayaj AlterPresse/AlterRadio ranmase.
2. Samdi 11 fevriye 2023 a, bandi ak zam, ki te sou motosiklèt, asasinen pou pi piti 5 moun, lè yo louvri kout zam nan yon estasyon moto, nan Karade, komin Taba.
3. Ant mwa jiyè pou rive mwa desanm 2022 a, plis pase 500 moun pèdi lavi yo nan vyolans, gang ak zam yo fè nan katye Brooklyn. Epitou, gen plizyè dizèn fanm ak ti fi, ki sibi zak kadejak, ak plizyè santèn lòt ki kouri bandonnen kote yo te rete yo, dapre yon rapò Òganizasyon Nasyon zini.
4. Samdi 11 fevriye 2022 a, lapolis nasyonal la di li arete, nan Dèlma 32, avèk yon badj brigad siveyans espas pwoteje yo (Bsap), Athazar Alexandre, li sispèk ki ta gen men l tranpe nan pase yon douzèn zak kidnaping, nan zòn metwopoliten Pòtoprens lan.
5. Samdi 11 fevriye 2023 a, bandi ak zam lage direktè jeneral Sant nasyonal ekipman yo (Cne) Kinston Louis, yo te kidnape depi samdi 4 fevriye 2023 a, nan Meyòt, Petyonvil.
6. Bandi ak zam toujou gen nan men yo jounalis Jean Thony Lorthé ak 2 lòt moun ki te ansanm ak li, yo te kidnape Laboul depi vandredi 3 fevriye 2023 a.
7. Depi otorite Leta yo pa pran dispozisyon pou met konwtòl sou zam k ap sikile nan peyi a, pou met kontwòl sou lajan kriminèl yo, ki kote lajan kidnaping yo ale, sizoka se nan yon sitiyasyon konsa yo pral fè eleksyon, se òganizasyo kriminèl yo ki pral dappiyanp pouvwa politik la. Se dizon, sou AlterPresse/Alterradio Konsèy aysiyen aktè ki pa nan Leta yo.
8. Otorite nan Leta yo ta dwe met kanpe yon inite espesyal pou fè fas kare ak gang ak zam yo, sou teritwa nasyonal la. Deklarasyon, nan memisyon TichèzBa, sou AlterRadio, Edgard Leblanc, kowodonatè pati politik Òganizasyon pèp k ap lite (Opl).
9. Nan kondisyon peyi d Ayiti ye jounen jodi a, li p ap posib teknikaman pou eleksyon ta fèt, anvan finisman laane 2023 a, dapre pati politik Opl, ki t ap pale nan emisyon TichèzBa sou AlterRadio.
10. Wo konsèy tranzisyon an gouvènmn defakto a estale lendi 6 fevriye 2023 a, ta dwe fè kowòdinasyon pi vit posib yon chita tande politik, pou ta jwenn plis tèt ansanm nan akò 21 desanm 2022 Ariel Henry an. Se sa k soti nan yon rezolisyon, vandredi 10 fevriye 2023 a, Konsèy pèmanan `Oganizasyon Leta ameriken yo (Oea), ki di y ap kore peyi d Ayiti nan zafè sekirite, nan kozman imanitè ak nan eleksyon.
[jep rc gp apr 13/02/2023 23:00]
Consulter +