Pòtoprens, 9 fevriye 2023 [AlterPresse] — Rèl nan Vèrèt ak Lyankou , lekòl anba zam, defi pou lapolis, woumble sou sekirite, bakaloreya…
1. Pou pi piti 6 moun mouri anba bal, plizyè lòt blese, anpil lòt disparèt, nan yon atak gang ak zam Gran grif Savyen yo fè, lannuit mèkredi 8 pou antre jedi 9 fevriye 2023 a, nan komin Vèrèt, depatman Latibonit, apre atak yo te fè deja nan Lyankou ak Ti Rivyè Latibonit.
2. Pou 6 premye jou klas mwa fevriye 2023 yo, gen 30 lekòl ki blije fèmen pòt yo akoz vyolans gang ak zam yo. Sou yon lane, kantite zak vyolans ak zam yo sou lekòl yo miltipliye pa 9. Gen yon milyon timoun, ki pa ale lekòl akoz latwoublay ak klima laterè a nan peyi d Ayiti. Si pa gen okenn aksyon an ijans pou pwoteje lekòl yo kont zak vyolans yo, elèv yo kapab pèdi plis jou lekòl toujou, disi mwa jen 2023 a. Se kout rèl branch nan peyi d Ayiti Fon Nasyon zini pou timoun, yo plis konnen sou non Unicef.
3. Nan jou k ap vini yo, estrikti Wo konsèy tranzisyon an ta gen pou òganize yon woumble sou sekirite. Se sa k soti nan yon reyinyon, mèkredi 8 fevriye 2023 a, ant manm Wo Konsèy tranzisyon an ak manm gouvènman defakto a, dapre sa ministè kilti ak kominikasyon fè konnen.
4. Lapolis nasyonal peyi d Ayiti a p ap ka leve defi, ki makònen ak pwoblèm sekirite a, k ap angrave sou teritwa nasyonal la. Se dizon sekretè jeneral, depi lane 2015, Òganizasyon leta ameriken yo (Oea), Irigweyen Luis Almagro, ki t ap pale nan Nasyon zini, madi 7 fevriye 2023 a.
5. Enspeksyon jeneral polis nasyonal d Ayiti a rekonèt, san l pa site non, yon polisye Idmo te gen yon move konpòtman, lè jounalis Romelson Vilcin te mouri sasinen, dimanch 30 oktòb 2022 a, nan lakou komisarya polis Dèlma 33 a.
6. Mèkredi apremidi 8 fevriye 2023 a, san pèsonn pa rive konnen sou ki kondisyon, bandi ak zam Kokorat san ras yo lage Washny Bien-Aimé, direktè jeneral Sant ki resevwa ak livre dokiman idantite yo nan Sen Mak, ansanm ak plizyè lòt moun, yo te kidnape, madi swa 7 fevriye 2023 a, nan Lakwa Peris, komin Lestè, depatman Latibonit.
7. Ant lendi 13 pou rive jedi 16 fevriye 2023 a, pral gen yon lòt sesyon ekzamen bakaloreya pèmanan, dapre ministè edikasyon nasyonal.
[jep rc gp apr 09/02/2023 23:00]
Consulter +
