Pòtoprens, 14 novanm 2022 [AlterPresse] --- Lendi 14 novanm 2022 a, yon konvwa anbasad ameriken nan peyi d Ayiti sibi atak endividi ak zam, yo poko idantifye, nan komin Kwadèboukè, dapre enfòmasyon ki vin jwenn ajans AlterPresse nan bon ti mamit.
Atak ak zam sa a rive sou wout ki soti nan zòn fwontyè Ayiti ak Repiblik Dominiken, pou rantre Pòtoprens, dapre menm sous yo.
Pesonn pa konnen si se menm gang ak zam 400 mawozo yo, k ap opere nan Kwadèboukè, depi plizyè mwa, ki ta tire ak bal sou konvwa anbasad peyi Etazini an, nan peyi d Ayiti.
Atak sa a rive, yon semenn apre depatman Leta ameriken te di l ap bay 3 milyon dola ameriken, pou moun ki ta bay enfòmasyon, ki va pèmèt yo met men sou 3 gwo chèg gang ak zam nan peyi d Ayiti.
Lendi 7 novanm 2022 a, depatman Leta ameriken anonse l ap bay 3 milyon dola ameriken pou enfòmasyon ki ka pèmèt yo arete 3 chèf gang ak zam (yon milyon dola ameriken pou yo chak), dèske yo te kidnape 16 misyonè ameriken ak yon misyonè kanadyen, nan dat samdi 16 oktòb 2021, nan menm zòn Kwadèboukè a.
3 chèf gang ak zam sa yo, se Wilson Joseph yo plis konnen sou non Lanmò Sanjou, Jermaine Stephenson, alias Gaspiyáy, yo toulède k ap opere nan Kwadèboukè, ak Vitelhomme Innocent, k ap opere nan Tòsèl, Pènye ak Taba . [gp rc apr 14/11/2022 14:40]
Consulter +
