Pòtoprens, 13 novanm 2022 [AlterPresse] — Antèman, blende, trafik minisyon, ensekirite, sanksyon, gaz, lavichè, mach…
2. Se lendi 14 novanm 2022 a, y ap chante,nan legliz katolik women Sen Pyè, Petyonvil, antèman dirijan politik ak biznismann Eric Jean-Baptiste, ki te sekretè jeneral pati politik Rasanbleman demokrat nasyonal pwogresis yo (Rdnp), bandi ak zam te asasinen, ansanm ak sekirite l, Peterson Vernius, vandredi swa 28 oktòb 2022 a, nan Laboul 12. Se vandredi maten 11 novanm 2022 yo te chante antèman sekirite Eric Jean-Baptiste la, Peterson Vernius, bandi ak zam te asasinen ansanm avè l.
3. Samdi 12 oktòb 2022 a, bandi ak zam, k ap opere nan Kanaan, sou wout nasyonal nimewo 1 an, rive met dife nan youn nan nouvo blennde, lapolis fèk resevwa yo. Gen bakòp, ki te vin pran polisye nasyonal, ki te nan blennde a. Men, gwo kout zam, ki t ap chante yo, te lakoz kè sote nan zòn nan, tankou nan Bon Repo, ki pa twò lwen Kanaan.
4. Samdi 12 novanm 2022 a, nan nivo Mòn Kabrit, pa twò lwen komin Kwadèboukè, lapolis nasyonal di li arete youn nan enspektè l, Wakin Pierre, yo te jwenn, sòti nan komin Beladè, ba Plato santral, ak plizyè zam plis 4 mil katouch kalib 5.56 milimèt, anpil lòt katouch ak chajè, plis plizyè milye goud lajan likid.
5. Nan mitan mwa novanm 2022 a, sitiyasyon sekirite a toujou ap angrave rèd mare, toupatou, sou teritwa nasyonal la, espesyalman nan zòn metwopoliten Pòtoprens lan. Akote gwo kout zam, y ap fè chante tribò babò, bandi ak zam yo kontinye ap asasinen moun ak bal, dechèpiye moun, simaye laterè, tankou zak kidnaping san gade dèyè yo, san lapolis pa rive fè anyen pou kwape yo.
6. Sou inisyativ kolektif medya sou Entènèt yo, anpil anpil jounalis manifeste, dimanch 13 novanm 2022 a, nan Pòtoprens ak Dèlma, pou ekzije jistis pou tout jounalis ki mouri nan move kondisyon ak viktim zak lapolis, pandan lane 2022 a. Yo mande espesyalman jistis pou jounalis Romelson Vilcin, lapolis te asasinen ak yon bal nan tèt, nan lakou komisarya polis Dèlma 33 a, dimanch 30 oktòb 2022 a.
7. Semenn sa a, sou teritwa nasyonal la, bank yo ap travay lendi 14, madi 15, mèkredi 16 ak jedi 17 novanm 2022 a, dapre Asosyasyon pwofesyonèl bank yo (Apb).
8. Plizyè estasyon distribisyon, ki resevwa gaz nan zòn metwopoliten Pòtoprens lan, deja koumanse vann gaz, nan pri grad divizyon gouvènman defakto a deside kenbe a, malgre pwotestasyon popilasyon an. Anpil ponp, nan vil pwovens yo, poko resevwa gaz.
9. Asosyasyon pwopriyetè ak chofè peyi d Ayiti yo kontinye lonje dwèt sou gouvènman defakto a, ki deside kenbe pri gaz la nan nivo ogmantasyon grad divizyon li te anonse yo, malgre pri barik gaz la bese sou mache entènasyonal la, soti nan nivo 127 dola ameriken nan mwa septanm 2022 a, pou desann nan nivo 85 dola ameriken nan mwa novanm 2022 a.
10. Kouman popilasyon an pral fè fas kare ak pri kous machin yo, ki monte tou grad divizyon, depi plizyè semenn? Toujou gen bouch louvri ant pasaje ak chofè kamyonèt ak tap tap, divès kote.
11. Kò espesyalize dominiken sekirite sou fontyè ant Ayiti ak Repiblik Dominiken an, yo plis konnen sou non Cesfront, di li arete, nan dènye jou sa yo, 57 natif natal Ayisyen, li te jwenn san papye, nan plizyè otèl Comendador, pwovens Elías Piña, pa twò lwen fontyè Beladè Ayiti a.
12. Nan moman bri ap kouri sou sansksyon plizyè gouvènman etranje ta pran kont gwo chabrak nan gouvènman defakto a, 2 minis, Berto Dorcé, ki te minis defakto lajistis, ak Liszt Quitel, ki te minis defakto enteryè, bay demisyon yo,vandredi 11 novanm 2022 a, andedan gouvènman defakto Ariel Henry an.
[jep rc gp apr 13/11/2022 23:00]
Consulter +
