Pòtoprens, 11 novanm 2022 [AlterPresse] — Kout zam, gaz, Jounalis tonbe, lakilti an dèy, omaj Eric Jean-Baptiste, Tps, Kanada, migran…
1. Vandredi 11 novanm 2022 a, gwo kout zam te kontinye chante nan Saván Pistach, Kafou Fèy, kote gang ak zam ap eseye tabli baz yo, depi lannuit mèkredi 9 pou antre jedi 10 novanm 2022 a.
2. Lapolis nasyonal deklare li te gen yon blennde, ki te tonbe an pán, nan moman operasyon ranfò, li te pote, jedi 10 novanm 2022 a, nan Saván Pistách, Kafou Fèy. Lapolis nasyonal la di li te pran dispozisyon remòke blennde an pán nan, mennen l nan garaj.
3. Sou 3 jou, gen plis pase 2 milyon galon gaz, 265 kamyon te pote sou siveyans lapolis nasyonal la, ki ale nan plizyè ponp distribisyon gaz. Se dizon responsab West Indies Energy Company (Wineco), ki gen pi gwo enstalasyon estokay gaz yo (70 pousan) nan peyi d Ayiti.
4. Antretan, plizyè responsab ponp gaz pa gen ase kapital pou fè kòmann gaz, akoz ogmantasyon plis pase 100 pousan, gouvènman defakto a pa tande pa wè, li vle pou gaz lan vann nan ponp yo, apati samdi 12 novanm 2022 a, sou teritwa nasyonal la.
5. Pou fè fas kare ak gwo ogmantasyon pri gaz la, Sendika nasyonal polisye ayisyen yo (Synapoha) mande gouvènman defakto a mete salè polisye nasyonal yo nan nivo 50 mil goud chak mwa ak bay kat debi 30 mil goud.
6. Nan memwa 8 jounalis, ki pèdi lavi yo, nan move kondisyon, depi koumansman lane 2022 a, Kolektif medya ayisyen ki sou Entènèt yo anonse yon manifestasyon, dimanch 13 novanm 2022 a, soti sou Channmas, Pòtoprens, pou pase sou Dèlma a, epi retounen Pòtoprens. Yo prevwa yon seremoni mistik vodou, douvan komisarya polis Dèlma 33 a, kote yon polisye nasyonal te touye ak yon bal nan tèt jounalis Romelson Vilcin, dimanch 30 oktòb 2022 a.
7. Gwo atis pent, ki te vin pran nasyonalite fransè, Hervé Télémaque, ki te fèt Pòtoprens Ayiti, nan dat 5 novanm 1937, mouri, nan vil Pari (kapital peyi Lafrans), jedi 10 novanm 2022 a. Se yon maladi ki te fè l deplase sou chèz woulant, nan dènye ane sa yo, ki pote Hervé Télémaque ale, ak 85 lane sou tèt li.
8. Apati dimanch 13 novanm 2022 a, lari Kot plaj 18, nan Kafou, ap rele avni Eric Jean-Baptiste. Lendi 14 novanm 2022 a, va gen yon jounen dèy nan komin Kafou. Se desizyon ekip ajan ekzekitif enterimè lakomin Kafou an fè konnen yo pran, nan memwa biznismann ak ansyen sekretè jeneral pati politik Rasanbleman demokrat nasyonal pwogresis yo (Rdnp), bandi ak zam te sasinen, ansanm ak sekirite l Peterson Vernius, lannuit vandredi 28 oktòb 2022 a, nan Laboul 12.
9. Peyi d Ayiti sou lis 6 peyi, gouvènman ameriken Joe Biden nan deside l ap kontinye bay, jis lane 2024, estati pwoteksyon pwovizwa a, sa tout moun konnen sou non Tps la.
10. Nan yon reyinyon, mèkredi 9 novanm 2022 a, ak yon ekip espesyal minis ak lòt gwo responsab politik, ki anchaje analize yon seri dosye espesyal, premye minis Kanada a, Justin Trudeau, plede anfavè dispozisyon, tout patnè peyi Kanada yo ta va pran, pou pèmèt èd imanitè yo rive jwenn moun ki nan plis bezwen yo, nan peyi d Ayiti, ki anba gwo touman ak latwoubláy depi plizyè mwa.
11. Pou reponn wo komisarya Òganizasyon nasyon zini dwa moun yo, ki mande tout peyi Amerik yo sispann pimpe vini, nan peyi d Ayiti, natif natal ayisyen ki lakay yo, akoz sitiyasyon latwoubláy yo, sou teritwa nasyonal la, prezidan Repiblik Dominiken an, Luis Abinader Corona, deklare l ap rapousuiv, rèd mare, politik pimpe natif natal ayisyen yo andeyò teritwa dominiken an.
12. San l pa presize konbyen elèv ak konbyen pwofesè ki te vini nan klas, ministè edikasyon nasyonal fè konnen gen 127 lekòl sou 721, ki te louvri pòt yo, nan depatman Nip peyi d Ayiti, apati lendi 7 novanm 2022 a. Nan reyalite a, lekòl la poko janm relouvri, depi mwa jen 2022 a, sou teritwa peyi d Ayiti a, alòskyen fe nou deja antre byen fon nan mwa novanm 2022 a.
[jep rc gp apr 11/11/2022 23:00]
Consulter +
