Beladè (Ayiti)., 8 novanm 2022 [AlterPresse] --- Madi 8 novanm 2022 a, otorite Repiblik Dominiken yo arete, nan Comendador, pwovens Elias Piña, sou fontyè ak Beladè a, Mildrenne Manessa Milien, ki se madanm vis delege Beladè a, Yvanosky Joachim, ak yon chajman plizyè fwa mil katouch, nan machin ni, dapre yon atik jounal dominiken Listin Diario, ajans sou entènèt AlterPresse te li.
Otortite dominiken yo di yo jwenn nan machin nan yon total 22,160 katouch, pami yo 12 mil katouch kalib 7.62 mm ak 10,160 kalib 5.62 mm, ki t p pran direksyon Ayiti.
Otorite dominiken yo jwenn tou plis pase 30,510 goud ak 1,100 peso dominiken nan machin nan.
Divès sous, ajans AlterPresse kontakte nan Beladè, konfime nouvèl arestasyon Mildrenne Manessa Milien an, ki se madanm vis delege Beladè a, Yvanosky Joachim.
Machin nan, Mildrenne Manessa Milien t ap kondui an, t ap retounen nan Carrizal, bò kote Ayiti a.
Madanm vis delege Beladè a te gen ansanm ak li yon dam ak yon ti fi, ki gen anviwon 2 lane.
Se yon machin, ki abitye fè ale vini nan Comendador, san otorite sou fwontyè a pa fouye l, dapre jounal dominiken an Listin Diario.
Men, gen yon militè dominiken, ki gen sèlman 3 jou depi l vin nan pòs fwontyè Comendador ak Beladè a, ki deside fè kontwòl nan machin nan, kote l tonbe sou gwo chajman katouch sa a, madanm vis delege Beladè a ta pral pote nan peyi d Ayiti.
Depi plizyè mwa, Yvanosky Joachim ak pwòch li yo ap viv nan Comendador, pou li ta ka pwoteje fanmi li, pa rapò ak klima laterè, ki genyen nan peyi d Ayiti a, dapre sa Listin Diario rapòte.
Vis delege Beladè a di jounal dominiken an li aprann nouvèl chajman katouch lan ak anpil sezisman.
Li pa gen okenn esplikasyon sou sa k pase a.
Li deklare madanm ni t al chèche youn nan pitit fi yo, ki lekòl nan Comendador.
Yvanosky Joachim, se yon moun tout otorite dominiken konnen byen sou fwontyè Carrizal la, pou volonte ak enterè li toujou montre nan chèche regle bouch louvre, ki konn genyen sou fwontyè Comendador ak Beladè a, toujou dapre jounal Listin Diario.
Nouvèl sou plis pase 22 mil katouch, otorite dominiken yo sezi nan machin madanm vis delege Beladè a, madi 8 novanm 2022 a, sou fwontyè Comendador la, vin fè anpil moun ap poze kesyon sou trafik zam, ki genyen sou fwontyè ant Ayiti ak Repiblik Dominiken.
Depi apremidi madi 8 novanm 2022 a, gen anpil pawòl k ap pale sou rezo sosyal yo, avèk foto Mildrede Manessa Milien, madanm vis delege Beladè a, Yvanosky Joachim, otorite dominiken yo arete avèk plis pase 22 mil katouch, nan machin ni ki ta pral travèse fwontyè a, pou rantre Ayiti.
Gen kesyon k ap poze sou konfyolo ofisyèl, gwo chabrak nan peyi d Ayiti genyen ak gang ak zam yo, k ap simaye laterè, toupatou sou teritwa nasyonal, avèk pakèt batanklan zam ak katouch, ki pase nan ladwann yo, soti nan peyi Etazini, ak sou fwontyè ant Ayiti ak Repiblik Dominiken, anba je otorite ayisyen yo, ki kontinye kenbe yon konpòtman manfouben. [jep rc apr 08/11/2022 15:45]
Consulter +
