Pòtoprens, 7 nov. 2022 [AlterPresse] — Ansasinay jounalis, milyon dola pou peye tèt chèf gang, sanksyon sou politisyen, ensekirite, gaz…
1. Samdi 5 novanm 2022 a, nan zòn Karade, komin Taba, bandi ak zam asasinen anba bal jounalis Radyo Megastar, Fritz Dorilas, ki t apr antre lakay li. Sa fè 3 zyèm jounalis, ki mouri asasinen, nan mwens pase yon mwa, nan peyi d Ayiti, apre Gary Tess nan dat 24 oktòb 2022 Okay ak Romelson Vilcin dimanch 30 oktòb 2022 a nan komisarya polis Dèlma a.
2. « Lajistis dwe fè limyè sou kò sasinay sou Fritz Dorilas la. Okenn jounalis pa dwe mouri nan ekzèsis metye l. Se pou Leta fè kou l konnen pou pwoteje jounalis yo ». Se dizon mèt avoka Darbensky Gilbert, ki te konn anime emisyon « le droit, la loi et la justice » ak jounalis Fritz Dorilas, sou Radyo Megastar.
3. Lendi 7 novanm 2022 a, depatman leta ameriken anonse l ap bay 3 milyon dola ameriken pou enfòmasyon, ki ka mennen yo arete 3 chèf gang ak zam (yon milyon dola ameriken pou yo chak), dèske yo te kidnape 16 misyonè ameriken ak yon misyonè kanadyen, nan dat samdi 16 oktòb 2021. 3 chèf gang ak zam sa yo, se Wilson Joseph yo plis konnen sou non Lanmò Sanjou, Jermaine Stephenson, alias Gaspiyáy, yo toulède k ap opere nan Kwadèboukè, ak Vitelhomme Innocent, k ap opere nan Tòsèl, Pènye ak Taba.
4. Ansyen senatè Youri Latortue deklare li retire kò l nan tèt plizyè biznis, apre gouvènman Kanada ak Etazini akize l, limenm ak senatè Joseph Lambert, kòm moun ki ta nan sa k pa sa, nan mankemelanj, k ap patisipe nan aktivite kriminèl, trafik dwòg ak kòkòday ak gang ak zam yo, nan peyi d Ayiti.
5. Komin Ti Rivyè Latibonit bezwen sekirite, pou vil la ka respire, sispann sibi atak gang ak zam yo, pou moun kapab d okipe aktivite yo kòmsadwa, pou kominote a ka jwenn dlo potab ak machandiz nòmalteman. Se temwayay yon abitan Ti Rivyè Latibonit sou AlterPresse/AlterRadio.
6. Malgre lapolis nasyonal fè konnen, li reprann kontwòl zòn tèminal Vare a, zòn sant estokay gaz la nan Site Solèy, depi vandredi 4 novanm 2022 a, poko gen okenn ponp, okenn estasyon distribisyon ki resevwa gaz, pou vann lendi 7 novanm 2022 a.
7. Pa gen okenn fòs politik, ki montre yo gen kapasite pou vini ak yon pwopozisyon, pou fè peyi d Ayiti soti tout bon vre nan tyouboum, li ye a. Se dizon Frantz Voltaire, ki se prezidan Sant entènasyonal dokiman ak enfòmasyon sou peyi d Ayiti, lòt peyi Karayib yo ak afro kanadyen yo (Cidihca), sou AlterPresse/AlterRadio.
8. Nan peryòd latwoublay jodi a, Òganizasyon sitwayèn ak sitwayen pou yon lòt Ayiti voye yon pinga kont mache prese, yon seri òganizasyon vle fè nan demach pou chwazi reprezantan òganis dwa moun yo andedan Konsèy siperyè pouvwa lajistis la (Cspj).
9. Ant lendi 24 oktòb pou rive dimanch 6 novanm 2022 a, 13 moun mouri ak 59 lòt blese nan aksidan sikilasyon sou teritwa nasyonal la, dapre Sèvis teknik ak operasyon pou prevni aksidan machin ak motosiklèt nan peyi d Ayiti (Estòp aksidan).
[jep rc gp apr 07/11/2022 23:00]
Consulter +