Deklarasyon Regwoupman Edikasyon Pou Tout Moun (Rept)
Dokiman sa a vin jwenn AlterPresse 31 oktòb 2022
Regwoupman Edikasyon Pou Tout Moun (REPT) denonse zak vyolans, ansèkleman, sènay san parèy pwofitè kriminèl ak konplis nasyonal ak entènasyonal ap fè sou popilasyon an, sou pèp ayisyen an, nou menm ansanm ak sou sè ak frè nou, pou dechèpiye pèp la ak jistifye entèvansyon militè etranje nan peyi a.
Regwoupman Edikasyon Pou Tout Moun (REPT) pwononse l kont entèvansyon militè etranje nan peyi a.
Regwoupman Edikasyon Pou Tout Moun (REPT) denonse jan pwofitè kriminèl konplis nasyonal ak entènasyonal yo kite bandi ak zam ap dechèpiye popilasyon an, fè kidnapin, fè kadejak, vòlè, piye. Yo monte pri gaz la men wotè san konsiderasyon pou popilasyon an ak lavi chè a. Yo bloke gaz la pou l pa rive nan ponp. Yo fè lekòl pa ka louvri. Yo fè aktivite peyi a pa ka fèt nòmalman.
Malgre sa, Regwoupman Edikasyon Pou Tout Moun (REPT) panse pèp ayisyen pa p jwenn bon solisyon pwoblèm nou yo nan entèvansyon militè etranje nan peyi a.
REPT kwè gen nesesite pou sistèm edikasyon nou an makonnen ak lanmou pou moun, lanmou pou peyi a, lanmou lapatri ak lanmou limanite. Lanmou sa yo pa mache avèk demann entèvansyon militè etranje..
REPT apiye rezistans ak detèminasyon pèp ayisyen an nan lit pou chanje sitiyasyon malouk n ap viv la san entèvansyon militè etranje, pandan n ap kontinye travay ansann pou bon kalte ledikasyon piblik gratis pou tout moun.
Pòtoprens, 28 oktòb 2022
William Thélusmond
Direktè Egzekitif REPT
Consulter +
