Pòtoprens, 23 oktòb 2022 [AlterPresse] — Vyolans, san koule, afwontman, danje katastwòf, izin fèmen, sanksyon…
1. Vandredi apremidi 22 oktòb 2022 a, plis pase 10 moun mouri ak plizyèt lòt blese anba bal, lè yon seri endividi, ki te nan yon machin pikòp nwa, simen kout bal nan estasyon machin Plato santral la, nan zòn Bon Repo, dapre plizyè temwayáy.
2. Samdi 22 oktòb 2022 a, gen yon jenn gason ki rele Widzet Estimable, yo te plis konnen sou non Lodè, lapolis sispèk ki ta andedan gang nan Palmis, ki mouri, nan boukantay kout zam ak lapolis, nan zòn Ti Rivyè latibonit, dapre lapolis.
3. Menm samdi 22 oktòb 2022 a, gen 2 moun, yo konnen sou non John ak Michelet Jean, lapolis sispèk ki ta nan gang yo rele Bon diri a, ki mouri nan boukantay kout zam ak lapolis, nan Pòdpè, depatman Nòdwès peyi d Ayiti, dapre lapolis.
4. Samdi apremidi 22 oktòb 2022 a, nan lokalite Ti Bwadòm, ant komin Basen Ble ak Gwo Mòn, bandi ak zam kidnape, apeprè 30 pasaje, ki te nan yon ti bis, ki t ap soti Pòdpè, depatman Nòdwès peyi d Ayiti.
5. Ant samdi premye pou rive vandredi 21 oktòb 2022 a, gen 37 moun ki mouri nan maladi kolera a, nan peyi d Ayiti. Gen 4 ka, moun ki trape maladi kolera a, nan depatman Plato santral, dapre Òganizasyon paameriken Lasante (Ops).
6. Avèk vyolans lan plis maladi kolera a, ki reparèt koumansman mwa oktòb 2022 a, avèk sitiyasyon imanitè a, k ap degrade chak jou pi plis, gen danje katastwòf, nan peyi d Ayiti, kote popilasyon an gen tou difikilte pou jwenn dlo potab. Se kout rèl òganizasyon Medsen san fontyè (Msf).
7. Nan dènye semenn sa yo, plis pase 20 mil ouvriyèz ak ouvriye pèdi travay yo nan divès faktori, nan zòn metwopoliten Pòtoprens lan. Plizyè izin, ki pa ka fè kòmann ankò, blije fèmen pòt yo, akoz sitiyasyon latwoublay ak katyouboumbe, kote peyi d Ayiti plonje a, san konte klima laterè nan divès zòn, tankou nan sid ak nan nò Pòtoprens lan. Se sa Platfom sendika izin testil- Batay ouvriye yo (Plasit-Bo) fè konnen.
8. Ak rezolisyon Konsèy sekirite Nasyon zini a, ki pran dispozisyon kont gang ak zam ak yo ak tout sila k ap ba yo lajan an, Òganizasyon Nasyon zini pral kapab mete kanpe yon gwoup ankèt sou zak kriminèl yo, nan peyi d Ayiti. Se dizon Sant analiz ak rechèch nan dwa moun.
[jep rc gp apr 23/10/2022 23:00]
Consulter +
