Español English French Kwéyol

Virewon aktyalite Ayiti : 21 an GM, vyolans, goudougoudou, kanntè, kidnapin…

Pòtoprens, 20 oktòb 2022 [AlterPresse] — 21 an GM, vyolans, goudougoudou, kanntè, kidnapin…

1. 20 oktòb 2001 – 20 oktòb 2022, Gwoup Medyaltènatif, ki responsab AlterPresse ak AlterRadio, antre nan venteyinyèm lane, depi l ekziste. Nan sikonstans latwoublay, rejim defakto a lage peyi a, jodi a, pa kapab genyen fèt ni okenn aktivite espesyal. Men, Gwoup Medyaltènatif kontinye, kanmenm, ankouraje tout kalte jefò, pou popilasyon an rive jwenn enfomasyon ak kominikasyon ki byen fèt, ki gen kalite, ki respekte prensip, pou pèmèt deba demokratik lan layite kòmsadwa nan peyi d Ayiti.

2. Sou yon semenn, 15 moun mouri, plis pase 20 fanmi sisnistre, 12 kay kankannen, nan vyolans ant gang ak zam Vitelhomme Innocent ak 400 mawozo, nan Vilaj Nwáy, komin Kwadèboukè.

3. Anbasad Lespáy nan peyi d Ayiti leve lavwa kont divès atak, gang ak zam yo ap plede fè sou moun, ki rete nan Vilaj Nwáy, komin kwadèboukè.

2. Jedi 20 oktòb 2022 a, tè an tranble ankò nan Payan, depatman Nip peyi d Ayiti. Moun nan nan Miragwán, Ti Rivyè Nip, Ansavo ak Ti Gwáv te santi soukous lan, ki, erezman, pa fè dega nan zòn nan.

3. Gadkòt ameriken yo fè konnen yo arete, madi 18 oktob 2022 an,epi voye tounen, nan peyi yo, 8 migran Ayisyen ak 74 migran Dominiken, ki t ap eseye rantre san papye sou zile Pòtoriko.

4. Malgre fanmi l te bay lajan, Ralph Sénécal, responsab Sam anbilans, sou 14 jou, nan dat 20 oktòb 2022 a, depi lnan men kidnapè ak zam, ki te kidnape l, ansanm ak chofè l, nan Gantye.

5. Jedi 20 oktòb 2022 a fè 3 jou, depi fanmi jounalis Garry Tess, ki anime yon emisyon nan Radyo Lebon Fm, Okay, depatman Sid peyi d Ayiti, san nouvèl sou jounalis la, apre l te kite lakay li, pou ale nan Radyo Lebon Fm Okay.

8. Mèkredi 19 oktòb 2022 a, nan Piyon, depatman Nò peyi d Ayiti, anpil moun touye Josnel Lebrun, apre l te fin dechèpiye plizyè moun nan vil la.

9. Yon okipasyon militè, se la ekip Pati ayisyen tèt kale a (Phtk) te vle rive, pou lajistis pa jije yo pou tout vòl ak krim yo fè nan peyi a pandan 11 lane. Se pozisyon Antèn ouvriye Ayiti (Aoa), ki denonse desizyon gouvènman Phtk 3zyèm vèsyon an, pou fè militè etranje vin deplòtonnen ankò nan peyi d Ayiti

10. Joseph Félix Badio, youn nan moun ki parèt sispèk, nan kò sasinay 7 jiyè 2021 an, sou ansyen prezidan defakto Jovenel Moïse lan, voye manda bay jounalis Esau César ak Garry Pierre-Paul Charles, animatè politik Luckner Désir ak direktè Rezo nasyonal k ap defann dwa moun yo, Pierre Espérance, kòm moun ki ta fè manti ak voye move akizasyon sou li

11. Plizyè pastè ayisyen swete yon chita tande tèt ansanm ant divès sektè, pou sove diyite nasyonal la, ki sou lagraba

[jep rc gp apr 20/10/2022 23:00]