Pòtoprens, 02 oktòb 2022 [AlterPresse] — Kolera tounen, lopital ap fèmen, menas kriz dlo potab, lekòl ak tribinal pa relouvri nòmalman, sèvis labank diminye…
2. Ministè sante piblik fè konnen, samdi premye oktob 2022 an, li dekouvri yon ka maladi kolera nan Savann Pistach/Dekayèt, nan komin Pòtoprens, ak divès ka sispek nan Brooklyn, komin Site Solèy. Pou evite trape maladi kolera a, tout moun dwe respekte mezi lijyèn yo, nan lave men yo tout tan, dapre ministè sante piblik.
3. Ratman gaz lan toujou ap pèsiste pi rèd nan peyi d Ayiti. Samdi premye ak dimanch 2 oktòb 2022 a, anpil anpil moun t al eseye ravitaye yo, nan mache. Gen anpil kè kase lakay anpil anpil moun, ki pa ka prevwa ki sa k ka pase, semenn sa a, sou teritwa nasyonal la.
4. Akoz ratman gaz lan, lopital piblik Sent Terèz Miragwán, depatman Nip peyi d Ayiti, kapab sispann bay sèvis laswenyay ankò, apati lendi 3 oktòb 2022 a.
5. Se menm sitiyasyon an pou lopital prive Sakre Kè Milo a, depatman Nò, ki kapab sipann bay sèvis laswenyay tou, poutèt ratman gaz lan.
6. Ariel Henry dwe kite tèt pouvwa politik la, pou pèmet rantre lekòl la rive posib nan peyi d Ayiti. Se dizon Inyon nasyonal nòmalyen ayisyen yo (Unnoh), lavèy rantre ofisyèl lekòl la, ki ta sipoze fèt lendi 3 oktòb 2022 a.
7. Apati lendi 3 oktòb 2022 a, se sèlman 3 jou, chak semenn (lendi, mèkredi ak vandredi) bank yo ap kapab travay, jis rezèv gaz yo va pèmèt yo, sou teritwa nasyonal la. Se avètisman Asosyasyon pwofesyonèl bank yo (Apb).
8. Akoz menas, l ap resevwa anba men gang ak zam Ti Makak, ki tabli nan Laboul 12, pi wo komin Petyonvil, biwo reprezantan pap la nan peyi d Ayiti mande otorite yo fè nesesè, pou garanti sekirite tout moun ak misyon diplomatik yo, sou teritwa nasyonal la, nan yon lèt li voye bay ministè afè etranje Ayiti a.
9. Ajan Cuerpo especializado de control de combustibles (Ceccom), ki anchaje kontwòle komès gaz nan peyi Repiblik Dominiken, di yo sezi plis pase 8 mil galon gaz, nan men komèsan ayisyen, ki t ap eseye antre nan peyi d Ayiti, apati pwovens Elias Piña (pa twò lwen fontyè ayisyen Beladè, nan Ba Plato santral), Monte Cristi ak Dajabón (pa twò lwen fontyè Wanament, nan Nòdès peyi d Ayiti).
10. Ministè zafè sosyal di li leve lavwa kont zak, yon seri endividi t al fè, jedi 29 septanm 2022 a, nan Konpayi devlopman endistri yo (Kodevi), nan espas ki genyen anpil faktori yo, nan Wanament, sou fontyè ak vil dominiken Dajabón nan, kote yo te piye plizyè depo ak kraze divès enstalasyon.
11. Dwe gen yon tèt ansanm, pou pèmèt lakou yo ak tribinal yo fonksyone kòmsadwa. Se dizon Asosyasyon nasyonal majistra Ayisyen (Anamah), Asosyasyon pwofesyonel majistra yo (Apm), ki menase pwoteste kont nominasyon, an gwo ponyèt, plizyè jij nan lakou kasasyon an.
12. Akoz kondisyon pa reyini pou yon seremoni ofisyèl, pou louvri tribinal yo, Òganizasyon sitwayèn ak sitwayen pou yon lòt Ayiti swete yon tèt ansanm ant divès sektè, espesyalamn ti rès sena a, òganizasyon sosyal yo ak otorite lajistis yo, nan objektif pou rive fè lakou kasasyon ak sistèm lajistis la travay kòmsadwa.
13. Ministè lajistis ak sekirite piblik di li leve lavwa kont pakèt zak vyolans, ki fèt, pandan mouvman manifestasyon, nan dènye semenn sa yo, sou teritwa nasyonal la.
[jep rc gp apr 02/10/2022 23:00]
Source photo : Msf © Scott Eisen
Consulter +
