Pòtoprens, 27 septanm 2022 [AlterPresse] — Grèv ak manifestasyon kont lavichè ak kont gouvènman ap kontinye nan peyi Ayiti pandan apèl ap lanse pou chita tande, epi kriz imanitè ap angrave…
1. Menm jan ak lendi 26 septanm 2022 a, tout aktivite yo bloke, nan peyi d Ayiti, madi 27 septanm 2022 a, ki se dezyèm jou grèv jeneral, plizyè sendika chofè transpò piblik te lanse, kont desizyon monte pri gaz la, sou teritwa nasyonal la.
2. Madi 27 septanm 2022 a, Lapolis nasyonal gaye ak gaz lakimonjèn plis bal li tire anlè, nan zòn Lamarin ayisyen, Bizoton, yon manifestasyon plizyè milye moun, ki te sòti ankò nan komin Kafou, ap pwoteste nan lari a, malgre lapli ki te koumanse tonbe.
3. Plizyè lopital ak anpil biwo plis binis deside fèmen pòt yo oubyen yo kapab pa an mezi bay sèvis ankò, yo kapab sispann travay, akòz ratman gaz la, k ap pèsiste, depi plizyè mwa, sou teritwa nasyonal la.
4. Ekonomis Fritz Alphonse Jean, ki se prezidan eli ki soti nan akò Montana a, plizyè òganizasyon te siyen nan dat 30 dawout 2021 an, voye yon kout rèl chita tande, ant tout fòs nan peyi d Ayiti yo. Objektif : rive nan yon nivo tèt ansanm, ki ka mennen nan lapè sosyal, sou teritwa nasyonal la
5. Plis pase yon milyon edmi moun sibi anpil dirèkteman anba zak gang ak zam yo, nan peyi d Ayiti, k ap viv yon sitiyasyon imanitè tèt chaje. Se deklarasyon, douvan Konsèy sekirite Nasyon zini an, amerikèn Helen Meagher La Lime, ki se reprezantan espesyal Sekretè jeneral Oganizasyon Nasyon zini an ak chèf Biwo entegre Nasyon zini nan peyi d Ayiti, tout moun konnen sou non Binuh.
6. Johnley Pierre tout moun konnen sou non Lele, ki ta chèf gang Twa Rivyè, nan Pòdpè, depatman Nòdwès peyi d Ayiti, mouri nan boukantay kout zam ak lapolis, lendi 26 septanm 2022 an, nan Podpè. Nan operasyon an, lapolis arete Elder Saintil, 19 lane, ak Hames Eugène, 32 lane, li sispèk ki ta nan kòkòday ak gang ak zam Twa Rivyè a.
7. Lannuit lendi 26 pou antre madi 27 septanm 2022 a, 4 prizonye mouri, akòz pwoblèm lasante, nan prizon sivil Ti Gwáv la, sou wout nasyonal nimewo 2 a.
8. Madi 27 septanm 2022 a, yon moun mouri anba bal epi yon lòt blese tou ak bal, nan zòn Gatwo, Gonayiv, depatman Latibonit, nan kad mouvman pwotestasyon kont gouvènman defakto a.
9. Ministè edikasyon nasyonal leve lavwa kont zak kidnapin, bandi ak zam fè, wikenn pase a, sou 6 anplwaye ministè a, nan Pòtoprens. Gen 3, ki gen tan lage. Ministè edikasyon nasyonal pwofite tou denonse menas, plizyè lekòl ap sibi, sou teritwa nasyonal la.
[jep rc gp apr 27/09/2022 23:00]
Consulter +
