Pòtoprens, 21 septanm 2022 [AlterPresse] — Aktivite timid reprann nan kèk zòn pandan plizyè lòt rete sou brenzeng yo apre plis pase yon semèn blokaj total.
1. Lannuit lendi 19 pou antre madi 20 septanm 2022 a, bandi ak zam atake epi piye lakay jounalis Radyo Tele Kiskeya, Beethovens Fils François, ki pa t prezan nan moman atak la. Akoz menas li t ap sibi, konfrè jounalis Radyo Tele Kiskeya a te kite lakay li, depi dat 20 jen 2022, ki sot pase a.
2. Depi plizyè jou, anpil medya gen difikilte pou travay kòmsadwa, nan peyi d Ayiti. Non sèlman ekip medya yo pa ka rive nan biwo medya a, men tou ratman gaz lan, k ap pèsiste depi plizyè mwa, sou teritwa nasyonal la, gen gwo konsekans sou fonksyónman medya yo, dotan plis kouran piblik la kontinye ra, divès kote.
3. Nan gwo mouvman leve kanpe, k ap fèt depi 2 semenn nan peyi d Ayiti, gen plis pase 30 lekòl ki sibi gwo domaj, pami yo 16 nan depatman Latibonit. Reparasyon ta dwe fèt an ijans nan lekòl sa yo, anvan rantre lekòl la, ki ta sipoze fèt nan dat 3 oktòb 2022 a, dapre evalyasyon ministè edikasyon nasyonal.
4. Malgre pwomès premye minis defakto a, toujou pa gen gaz, toupatou, sou teritwa nasyonal la. Tout ponp yo rete fèmen, nan moman latwoublay sa yo, ki makònen ak mouvman pwotestasyon jeneral, depi yon semenn, nan peyi d Ayiti.
5. Madi 20 septanm 2022 a, tout aktivite yo toujou paralize sou teritwa nasyonal la, malgre lakomin ak ministè travo piblik te retire baarikad, divès kote, nan zòn metwopoliten Pòtoprens lan.
6. Anpil anpil moun te desann nan lari Mibalè, depatman Plato santral, madi 20 septanm 2022 a, pou kontinye ekzije demisyon Ariel Henry.
7. Nan kad operasyon li mennen, lapolis nasyonal nan Leyogán arete plizyè sispèk epi rive rekipere 2 zam, bandi, ki te gen manchèt nan men yo, te vòlò nan yon sikisal Unibank, yo te piye, lendi 19 septanm 2022 a, nan Leyogán. Gen yon moun ki te blese, nan moman bandi ak manchèt yo t ap sakaje, lendi 19 septanm 2022 a, yon sikisal Unibank nan Leyogán nan, kote yo pote ale chèz, materyèl biwo, òdinatè ak lòt materyèl.
8. Yon ajan lapolis nasyonal blese nan Sen Mak, nan Ba Latibonit, nan operasyon lapolis kont piyay biwo leta ak biznis prive, nan komin nan. Lapolis nasyonal Sen Mak di li arete 25 moun, li sispèk ki ta gen arevwa ak zak piyay, nan dènye jou sa yo, nan Sen Mak.
9. Madi 20 septanm 2022 a, plizyè moun atake yon biwo Acted nan Jeremi, depatman Grandans. Yo pote ale matla, frijidè, 5 motosiklèt òganis Acted, ki te sibi zak piyay tou lendi 19 septanm 2022 a. Gen lòt òganis entènasyonal, ki sibi atak tou nan Jeremi.
10. Gouvènman defakto a ta dwe tande rèl popilasyon peyi d Ayiti a, olye l kontinye bat ba douvan ekzijans Fon monetè entènasyonal yo (Fmi). Se dizon òganis dwa moun Fondasyon je klere (Fjkl), ki wè pa gen yon direksyon konsekan tout bon, ki responsab, ki fò, ki eklere, k ap bay mouvman revandikasyon yo jarèt, kòmsadwa.
[jep rc gp apr 21/09/2022 00:00]
Consulter +
