Pòtoprens, 15 septanm 2022 [AlterPresse] — Divès kote, nan zòn metwopoliten Pòtoprens lan ak plizyè rejyon peyi a te rete bloke, mèkredi 14 septanm 2022 a, ak gwo barikad kawoutchou ki t ap boule ak lòt batanklan, kont desizyon ogmante gaz gouvènman defakto a konfime menm jou a.
1. Pri gaz yo ta sipoze monte nan nivo plis pase 100 pousan, dapre desizyon konsèy gouvènman defakto a pran, madi 13 septanm 2022 a.
2. Se swa jamè. Gouvènman defakto a p ap ka monte gaz lan, jan l gen entansyon fè l lan. Se pinga plizyè moun, ki te leve kanpe, nan mitan jounen mèkredi 14 septanm 2022 a, nan komin Kafou.
3. Mèkredi 14 septanm 2022 a, plizyè endividi boule yon machin, lakay mèt avoka Michel André, manm Sektè demokratik ak popilè a (Sdp), ki nan alyansay ak gouvènman defakto Ariel Henry an, depi dat 11 septanm 2021. Marjorie Michel, youn nan manm Sdp yo, lonje dwèt sou plizyè dirijan politik, li akize nan atak sou kay mèt Michel André a, ki ta antre nan yon plan, dapre sa l fè konnen.
4. Mèkredi 14 septanm 2022 a, ajan lapolis nasyonal te gaye yon foul moun an kolè, ki te defonse baryè antre ak atake otèl Oasis, nan Petyonvil.
5. Asosyasyon nasyonal distribitè pwodwi gaz yo (Anadipp) leve lavwa, nan yon twit, kont divès atak, ki lakoz anpil dega nan plizyè estasyon gaz.
6. Okap, depatman Nò, Gonayiv, depatman Latibonit, Ti Gwáv, kote yo atake tribinal sivil la, Okay nan depatman Sid, kote manifestan yo t ap mache ak yon sèkèy ki gen foto Ariel Henry, se kèk pami anpil vil ki te bloke tou, ak gwo mouvman mobilizasyon kont gouvènman defakto a
7. Mèkredi 14 septanm 2022 a, se te 4triyèm jounen mobilizasyon nan vil Jeremi, depatman Grandans. Te gen barikad nan plizyè katye, detan manifestan t ap tire wòch ak moso boutèy divès kote
8. Aktivite yo te ralanti anpil tou nan vil Miragwán, depatman Nip. Tout enstitisyon piblik kou prive te fèmen pot yo, mèkredi 14 septanm 2022 an
9. Se 9 milya goud, ki sèvi pou kòmande gaz nan peyi d Ayiti, chak mwa. Sa ki ta fè 2 fwa plis kantite lajan Leta peye anplwaye l yo chak mwa, dapre sa ministè kilti ak kominikasyon fè konnen
10. Apre anbasad Lafrans, se tou anbasad Espay ak anbasad Canada ki anonse, mekredi 14 septanm 2022 an, yo fèmen pòt yo, akoz divès evenman k ap devlope nan peyi d Ayiti.
11. Marie Lydie Duvivier, ki te responsab kont kliyan nan konpayi telefòn Digicel, mouri asasinen, madi 13 septanm 2022 a, nan komin Taba. Bandi ak zam touye l, nan moman yo t ap eseye kidnape l.
12. Lapolis nasyonal d Ayiti di li louvri yon ankèt sou kò sasinay, bandi ak zam gang yo rele Ti Makak la fè, madi 13 septanm 2022 a, sou 3 polisye nasyonal. Patrick Octa (ki soti nan 25 kyèm pwomosyon polis nasyonal la) Rolny Destiné (28tyèm pwomosyon) ak Abdias Garlliothe (29vyèm pwomosyon), se 3 polisye nasyonal sa yo, gang ak zam Ti Makak yo asasinen nan lokalite Fesa, nan Laboul 12.
[jep rc gp apr 15/09/2022 00:00]
Photo : Pierre-Antoine Cherilin
Consulter +