Pòtoprens, 14 septanm 2022 [AlterPresse] — Vyolans fè plizyè viktim nan 2zyèm jou blokaj peyi a kont desizyon pou ogmante pri gaz la, kont lavi chè, ensekirite ak kont gouvènman Ariel Henry a.
1. Yon moun mouri anba bal douvan papòt Lona a sou Dèlma, 3 lòt blese ak bal nan Petyonvil, nan leve kanpe kont gouvènman defakto a, madi 13 septanm 2022 a.
2. Plizyè materyèl sibi gwo domaj, lè yon seri endividi atake, nan Petyonvil, Radyo Televizyon Modèl, ki se pwopriyete senate Rony Célestin, manm Pati ayisyen tèt kale a (Phtk).
3. Tout aktivite yo te paralize, divès kote, nan zòn metwopoliten Pòtoprens lan, madi 13 septanm 2022 a.
4. Manifestan yo kontinye pwoteste kont klima laterè gang ak zam yo, kont ratman gaz lan ak kont lavi chè a, detan y ap ekzije demisyon premye minis defakto a Ariel Henry.
5. Wout nasyonal nimewo 2 a te bloke tou, madi 13 septanm 2022 a, nan nivo komin Gresye ak Ti Gwáv.
6. Aktivite yo te paralize tou sou wout nasyonal nimewo 1 an, nan nivo komin Akayè ak Sen Mak.
7. Lendi 12 septanm 2022 a, plizyè milye moun te desann nan lari Jeremi, depatman Grandans, ak Okap, depatman Nò peyi d Ayiti.
8. Ansyen prezidan 2016-2017 nan peyi d Ayiti, Jocelerme Privert, swete yon vrè chita tande politik, pou evite peyi a plonje nan plis katyouboumbe.
9. Nan sitiyasyon latwoublay Ayiti twouve l la, anbasad Lafrans nan Pòtoprens anonse li fèmen sèvis li pou yon tan li pa presize.
10. Ant 10 septanm pou rive 10 oktòb 2022 a. ministè sante piblik peyi d Ayiti anonse yon kanpay espesyal, pou atire atansyon tout moun sou dega, lè yon moun deside touye tèt li, ta kapab fè nan sosyete a.
[apr 14/09/2022 00:00]
Foto : imaj sou ekran Rtvc
Consulter +
