Pòtoprens, 9 septanm 2022 [AlterPresse] —- Kriz gaz la fè san koule nan Pòtoprens pandan mobilizasyon kont gouvènman ak kriz ekonomik la ap kontinye, epi ansyen premye minis Claude Joseph frape pye l kont desizyon Repiblik Dominiken pou entèdi limenm ak 12 chèf gang antre nan peyi sa a.
1. Jedi 8 septanm 2022 a, 2 chofè moto-taksi mouri anba bal yon polisye nasyonal, nan yon ponp gaz, zòn Kafou Ti Fou, Pòtoprens.
2. Nan yon desizyon, li pran mèkredi swa 7 septanm 2022 a, prezidan dominiken an Luis Abinader entèdi ansyen premye minis defakto a Claude joseph ak 12 chèf kang kriminèl nan peyi d Ayiti antre nan peyi Repiblik Dominiken, poutèt 13 moun sa yo ta gen pou rann kont douvan lajistis oswa yo ta yon menas pou sekirite nasyonal ak enterè Repiblik Dominiken yo.
3. Se paske l ap defann peyi d Ayiti ak konpòtman ki kont Ayisyen yo sou teritwa dominiken an, Se paske li pa dakò ak pwojè dominiken yo pou fè Ayiti tounen depotwa Repbilik Domiken, ki fè Luis Abinader entèdi l antre nan peyi Repiblik Dominiken. Se dizon Claude Joseph, nan yon tweet.
4. Jedi 8 septanm 2022 a, mouvman pwotestasyon yo kont gouvènman defakto a te rapousuiv ankò Okap, depatman Nò, Gonayiv, Sen Mak ak Lyankou, depatman Latibonit, Wanament ak Tèrye Wouj, depatman Nòdès, ak Ti Gwáv, sou wout nasyonal nimewo 2 a.
5. Nan Okay, depatman Sid, manifestan yo kontinye ekzije bon jan dispozisyon pou debloke Matisan, zòn sid Pòtoprens, ki sou kontwòl gang ak zam depi dat premye jen 2021 an.
6. Mèkredi 7 septanm 2022 a, yon delegaasyon peyi d Ayiti te chita pale, nan peyi Nikaragwa, ak reprezantan Gwoup aksyon finans yo (Gafi), sou menas pou retire peyi d Ayiti, apati mwa dawout 2023, nan sistèm woulman lajan entènasyonal yo. Anplis minis defakto lajistis la, te gen reprezantan bank santral, bank tout bank yo, nan peyi d Ayiti ak Inite santral ransèyman finans yo, ransèyman sou woulman lajan yo nan peyi d Ayiti, moun plis konnen sou non Ucref.
7. Mèkredi 7 septanm 2022 a, Lapolis nasyonal di li arete nan Aken, depatman Sid peyi d Ayiti, 7 moun li sispèk ki nan trafik dwòg.
8. Premye minis defakto a, Ariel Henry, pa montre li gen okenn volonte pou jwenn bon jan solisyon nan kriz, k ap brase bil peyi d Ayiti a depi plizyè mwa. Se sa k esplike mouvman pwotestasyon nan lari yo, kont gouvènman defakto a. Se dizon, sou AlterPresse/AlterRadio, Konbit òganizasyon politik, sendikal ak popilè yo, ki voye jete lide pou ta patisipe nan yon pouvwa tèt ansanm ak Ariel Henry, jan kominote entènasyonal la swete sa.
[apr 09/09/2022 06:00]
Consulter +